कमला नगरपालिकाः सडकको खाल्डोमा डुबेर दुई दाजुभाईको मृत्यू, टोल शोकमग्न

न्यूज ब्यूरो, जनकपुरधाम । पूर्वी धनुषाको कमला नगरपालिकास्थित सडकको खाल्डोमा डुबेर दुई दाजुभाईको मृत्यू भएको छ ।

कमला नगरपालिका वडा नम्बर २ सराबे टोलस्थित मँगलबार दिउँसो स्थानीय रामबाबु साहका ७ बर्षिय रितिक साह र उनकै भाई श्यामबाबु साहका ५ बर्षिय छोरा रितिश साहको एकैपटक डुबेर मृत्यू भएको हो ।

नयाँ बनाउन लागिएको बाटोको छेउमा खनिएको खाल्डो (स्थानीय भाषामा नाला) मा डुबेर दुवै जनाको ज्यान गएको जिल्ला प्रहरी कार्यालय धनुषाले जनाएको छ । करिब १५ दिन अगाडी मात्र निर्माण भएको वडा नं. २ को सराबे टोलस्थित कृषि सडक बनाउन खनिएको खाल्डोमा डुबेर ज्यान गएको जिल्ल प्रहरी कार्यालय धनुषाले जनाएको छ ।

सराबेदेखि खजुरी जाने मुख्य बाटोबाट कनेक्ट गरिएको कृषि सडक बाटोको खाल्डोमा बर्षा भएपछि पानी जमेको थियो । नुहाउनको लागि दाजुभाई जाँदा डुबेर मृत्यू भएको हो ।

घरबाट बाहिर निस्केका दाजुभाई अबेरसम्म घर नआएपछि खोजबिन सुरु भएको थियो । कहिकतै कसैको घरमा समेत खेल्न गएको अवस्थामा खोज्दा खोज्दै जाँदा मृत अवस्थामा तैरिरहेको भेटिएको थियो ।

एकै पटक दाजुभाईको मृत्यू भएपछि सिँगो टोल शोकमग्न भएको छ । सो सडक बनाउने उपभोक्ता समिति वा ठेकेदारको लापरवाहीको कारण दुई बालकको ज्यान गएको स्थानीयले जनाएको छ । उनीहरुलाई कानुनी दायरामा ल्याउन माग समेत गरिएको छ ।

मृतक दाजुभाईको पोष्टमार्टमको लागि प्रादेशिक अस्पताल जनकपुर पठाएको हो ।