कमला नगरपालिकास्थित रहेको NTC टावरको पावर हाउसमा चोरी, ५० गाउँको टावर अवरुद्ध

न्यूज ब्यूरो, जनकपुरधाम । पूर्वी धनुषाको कमला नगरपालिकास्थित रहेको नेपाल टेलिकमको टावरको पावर हाउसमा चोरी भएको छ ।

गएराती करिब ११ बजेको समयमा नगरपालिका हाताभित्रै रहेको टावरको पावर हाउसमा चोरी भएको हो ।

गएराती चोरले टेलिकमको पावर हाउसमा जडान गरिएको मोटो तार काटेर लगेका छन् । ईन्भर्टर ब्याकपमा जडान गरिएको तार काटेर लगेको हो । सो तार महँगो तामाको रहेको नेपाल टेलिकमका सहायक प्राविधिक अधिकृत विशेश्वर साहले जानकारी दिए ।

साहका अनुसार, राती नै टावरको पावर (आईटी) हाउसमा चोरी भएको हो । सिस्टममा नोटिफिकेशन गएपछि मात्रै जानकारी पाएपछि घटनास्थल टोली पुगेको हो ।

कमला नगरपालिकाको कुना काप्चामा सिसिटिभी क्यामेरा जडान गरिएको छ भने स्थानीय एक व्यक्तिलाई नगरपालिका रेखदेखको जिम्मेवारी दिएको अवस्थामा चोरी भएको हो ।

टावर प्रहरी चौकी माचिको ७० मिटर अगाडीमै रहेको छ । सोही हाताभित्र प्रहरी चौकी रहेको अवस्थामा चोरले चोरी गर्न भ्याएपछि शंका उत्पन्न भएको छ ।

तार चोरी भएपछि मेन टावर (माचि) बाट कनेक्सन रहेको कमला नगरपालिकाको सिँगयाही मडान, जनकनन्दिनी गाउँपालिकाको इनरुवा, औरही गाउँपालिकाको परवाहा, शहिदनगरको डुमरियाचौक, कमलाको साघाराको टावर समेत डिस्कनेक्ट हुने भएको छ ।

विद्युत रहेसम्म टावर चल्ने तथा विद्युत कटेपछि टावर डिस्कनेक्ट हुने प्राविधिक अधिकृत साहले जनाए । उनका अनुसार, धनुषामा तार चोरी श्रृँखलावद्ध रुपमा हुन थालेकोप्रति चिन्ता व्यक्त गरे ।

उनले भने, यी ठाउँहरुबाट ५० बढी गाउँहरु सेवाबाट बञ्चित हुनेछ । लाईन कटे लगत्तै टावर समेत कटने जनाइएको छ । पावर हाउसमा अर्को तार जोडने प्रक्रिया थालिएको छ ।

यता, नगरपालिकाकाको टावर तर्फ फर्केको क्यामेरा भने सँचालनमा नरहेको एक कर्मचारीले बताए । चोर सिसिटिभीमा आएको हुन सक्ने बताईएको छ ।