धनुषाको विभिन्न स्थानमा ट्राफिक प्रहरीले सवारी चालकहरुलाई न्यानो बाँडदै

न्यूज ब्यूरो, जनकपुरधाम । धनुषामा अत्यधिक चिसो बढेपछि धनुषा ट्राफिक प्रहरीले आम सर्वसधारणलाई न्यायो बाँडने कार्य सुरु गरेको छ ।

जिल्ला प्रहरी कार्यालय धनुषाको समन्वयमा जिल्ला टराफिक प्रहरी कार्यालयले जिल्लाको विभिन्न स्थानमा दाउरा उपलब्ध गराउँदै नागरिकलाई न्यानो बाँडेका हुन् ।

धनुषाका ट्राफिक प्रमुख हरि ओलीले जिल्लाको विभिन्न ट्राफिक चेकपोष्टस्थित आम सर्वसाधारणलाई दाउरा उपलब्ध गराई आगो बालेका हुन् ।

विभिन्न स्थानबाट सवारीमा ओहोरदोहोर गर्ने सवारी चालकहरुलाई केही बेर न्यानो भएर मात्र जान अनुरोध समेत गर्न थालेका छन् । अत्यधिक चिसोको कारण मोटरसाईकल वा साईकल चलाउने सर्वसाधारणहरुलाई चिसोबाट जोगाउन ठाउँ ठाउँमा न्यानोको व्यवस्था गरेको हो ।

केही साता देखि मौसममा आएको परिवर्तनले नेपालको तराई भागमा चिसो बढेको छ ।

चिसोको कारण तराई क्षेत्र लगायतका जनजीवन प्रभावित बनेको अवस्थामा जिल्ला ट्राफिक प्रहरी कार्यालय धनुषा द्धारा जाडो मौसमलाई मध्य नजर गर्दै बाटोमा दाउरा बालेर जनतालाई सहजता गर्न थालेको प्रहरी प्रमुख ओलीले जानकारी दिए ।

बाक्लो हुस्सु र कुहिरोको कारण शित पर्न थालेपछि जनजीवन प्रभावित बनेको हो । बिहानैदेखि बाक्लो हुस्सु लाग्न थालेको छ । बाक्लो कुहिरोको कारण घाम लागेको छैन भने चिसोका कारण जनजीवन थप कस्टकर बन्न थालेको छ ।