रौतहटमा प्रहरी र अपराधिक समूहबीच भिडन्त, एकलाई ढाले

न्यूज ब्यूरो |
रौतहट, १५ असार । गएराती रौतहटमा नेपाल प्रहरी र अपराधिक समूहबीच दोहोर भिडन्त भएको छ ।

भिडन्तको क्रममा अपराधिक समूहका एक जनालाई प्रहरीले ढालेका छन् । रौतहटको राजदेवी नगरपालिका स्थित बागमती खोला किनारमा बिहीबार मध्य राति अपराधीक समूह र प्रहरी विच दोहरो गोली हानाहान भएको खण्डमा प्रहरीको गोली लागि एकको मृत्यु भएको हो ।

उक्त अपराधिक समूहका तीन जनाले अनटेस्ट मोटरसाइकलमा सवार मध्ये दोहोरो भिडन्तमा एक ढलेपनि अन्य दुई जना भने भारततिर भागेको प्रहरीले जनाएको छ ।

"त्यो क्षेत्रमा हामीले कडा गस्ती राखेका छौँ, नयाँ मान्छे, नयाँ अनुहार पनि देखियो । हाम्रो प्रहरीले कडाईका साथ चेकजाँच गरिरहेको थियो । चेकजाँचकै क्रममा अनटेस्ट मोटरसाईकलमा उनीहरु आएको थियो । चेकप्वाइन्ट भन्दा केही पर पुगेर उनीहरुले प्रहरीमाथि फायर गर्न थाल्यो । हामीले पनि जवाफी फायरिँग गरयौ र एक जना ढल्यो ।" रौतहटका प्रहरी नायव उपरीक्षक डिएसपी राम कुमार दामीले न्यूज ब्यूरोसँग भने ।

मृतकको सनाखत हुन सकेको छैन भने अन्दाजी बर्ष २६ २७ को रहेको जनाइएको छ ।

सो घटनास्थलबाट एक थान हतियार समेत बरामद भएको जिल्ला प्रहरी कार्यालय रौतहटले जनाएको छ ।