मृतक आरती साहकी सासू पनि जनकपुरबाट पक्राउ

न्यूज ब्यूरो, जनकपुरधाम । जनकपुरकी आरती साह मृत्यू प्रकरणमा मुछिएकी उनकी सासुलाई समेत धनुषा प्रहरीले पक्राउ गरेको छ । मृतक आरतीकी सासु रेणु देवी साहलाई आईतबार पक्राउ गरिएको हो ।

जनकपुरधाम उपमहानगरपालिका वडा नम्बर ७ थापाचोककी ५५ वर्षीया रेणु साहलाई आइतबार पक्राउ गरेको जिल्ला प्रहरी कार्यालय धनुषाका प्रवक्ता डीएसपी रञ्जन अवाले जानकारी दिए ।

आरती साहको हत्या मुद्दामा आरतीका श्रीमान मोतीबाबु भने हाल पुर्पक्षका लागि थुनामा छन् ।

गत जेठ ७ मा आफ्नै घरमा आरती झुण्डिएको अवस्थामा मृत फेला परेकी थिइन् । दाइजोको कारण श्रीमान, सासू, ससुरा, देवरलगायतले आरतीको हत्या गरेको माइती पक्षको आरोप छ ।

आरतीको मृत्यु प्रकरणमा माइती पक्षले आन्दोलन गर्दा तत्कालै पक्राउ परेका उनका श्रीमान मोतीबाबु अदालतबाट साधारण तारेखमा छुटेका थिए । त्यसपछि मुद्दालाई कमजोर बनाएको भन्दै आरतीका आमाबुवा, दाइ र बहिनीले आन्दोलन गर्दै आएका छन् ।

उनीहरुलाई काठमाडौंमा धर्ना बसेको झण्डै १० महिनापछि रवि लामिछाने गृहमन्त्री बनेको केही दिनमै वार्ता गरी धर्ना तोड्न लगाएका थिए ।