भोली जनकनन्दिनीवासीले भव्य दिपावली गरौँ, कम्तीमा एकदिन माँसाहारी नबेचौँः अध्यक्ष यादव

न्यूज ब्यूरो, जनकपुरधाम । धनुषाको जनकनन्दिनी गाउँपालिकाका अध्यक्ष दिपिनदेव यादवले भोली सोमबार भव्य रुपमा घरघरमा दिपावली गर्न आग्रह गरेका छन् ।

जनकनन्दिनी गाउँपालिकावासीलाई सम्बोधन गर्दै गाउँपालिका प्रमुख यादवले भोली माघ ८ गते सोमबार आ–आफ्नो घरबारीमा दिप प्रज्जवलन गरी दिपावली गर्न आग्रह गरेका हुन् ।

भोली सोमबार भारतको अयोध्यामा भगवान राम मन्दिरको प्राण प्रतिष्ठा हुने भएकोले धार्मिक आस्थाको हिसाबले सम्पूर्णलाई कम्तीमा एक दिन माँसाहार बेचबिखन नगर्न अनुरोध समेत गरेका छन् ।

सार्वजनिक स्थल, हाट बजार, होटेलमा समेत भोली सोमबार एक दिन माछा, मासु, मदिराजन्य वस्तुहरु बेचबिखन नगर्न आग्रह गरेका हुन् । उनले घरघरमा दिपोत्सव गरी रामजन्मभूमिमा भगवान रामको गृह प्रवेश हुने भएकोले हिन्दु धर्मावलम्बीहरुको लागि उत्साहको दिन भएको भन्दै तेलबाती गर्न आग्रह गरेका हुन् ।

यसका साथै, अध्यक्ष यादवले जनकनन्दिनी गाउँपालिकाभित्र पर्ने विभिन्न शक्तिपीठ, मठ मन्दिर, धार्मिक स्थलहरुमा भव्य रुपमा दिपोत्सव गर्न आग्रह गरेका हुन् ।