मदरसा निर्माण विषयमा दुई पक्षबीच झडप, ८ घाइते

न्यूज ब्यूरो, सिरहा, २० जेठ । मदरसा निर्माण गर्ने विषयलाई लिएर झडप हुँदा ८ जना घाइते भएका छन् । सिरहाको लहान–१८ सोभापुर ६ मा दुई पक्षबीच शनिबार झडप हुँदा ८ जना घाइते भएका हुन् ।

ईलाका प्रहरी कार्यालय लहानका डिएसपी गणेश चन्दका अनुसार दुई पक्षबीच मदरसा (मुस्लिम विद्यार्थी पढ्ने स्कुल) निर्माण गर्ने विषयमा शनिवार दिउँसो झडप हुँदा लहान–१८ शोभापुरका ५५ वर्षीय मोहम्मद अब्दुल, उनकी बुहारी ३५ वर्षीया समीना खातुन, ५५ वर्षीया जहीरा खातुन, छपन मियाँ, कलामुद्धिन मियाँ, मोहम्मद किस्मत, मोहम्मद जिवछा र जयन्त खातुन घाइते भएका हुन् ।

टाउको, हात, खुट्टामा चोट लागेका घाइतेहरुको लहान स्थित राम कुमार उमा प्रसाद स्मारक अस्पतालमा उपचार भइरहेको छ ।

एक पक्षले मदरसा निर्माण सुरु गरेको र अर्को पक्षले रोक्न खोजेपछि झडप भएको डीएसपी चन्दले जानकारी दिए । दुवै पक्षबीच ढुंगा हानाहान हुँदा अवस्था तनावग्रस्त बनेको थियो । घटनाबारे थप अनुसन्धान भइरहेको डिएसपी चन्दले बताए ।