जनकपुरः बुबाले झपारेपछि रेल चढी घर छाडेर भाग्दै थिए बालक, प्रहरीले गरे उद्धार

न्यूज ब्यूरो, जनकपुरधाम । नेपाल रेल्वेबाट एक बालकलाई उद्धार गरिएको छ । धनुषा प्रहरीले बालकलाई नियन्त्रणमा लिएर उद्धार गरेको हो ।

बुवाले झपारेपछि घर छाडेर भारत तर्फ भाग्दै गर्दा उनलाई धनुषाको विदेह नगरपालिकाको दुहबी हल्ट स्टेशनबाट नियन्त्रणमा लिएको हो ।

साईकल पञ्चर भएपछि बुवाले झपारेको भन्दै उनी दिक्क लागेर घर छाडेर भाग्दै गरेको अवस्थामा यात्रुहरुले सूचना दिएपछि उनलाई नियन्त्रणमा लिएको बताईएको छ । प्रहरी चौकी दुहबी एवम् रेल्वे प्रहरीले सूचना प्राप्त भए लगत्तै एक्सन लिएका थिए ।

महोत्तरीको जलेश्वर नगरपालिका वडा नं. ४ सुगा बस्ने स्थानीय फिरन झाको अन्दाजी १३ बर्षिय छोरा सत्यम झा घर छाडेर भाग्दै गर्दा प्रहरीले उद्धार गरेको हो ।

सत्यमले साईकल पञ्चर गरेर आएपछि बुवाले उनलाई झपारेको तथा एक झापड हानेको भन्दै रिसमा उनी घर छाडेर भागेको बयान प्रहरी समक्ष दिएको विदेह नगरपालिका वडा नं. २ दुहबी बस्ने स्थानीय शिक्षक श्रवण कुमार सहनीले न्यूज ब्यूरोलाई बताए ।

सत्यम बिना पैसाको जलेश्वरबाट बस चढेर जनकपुर आएका थिए । उनी रेल्वेमा समेत बिना टिकटकै एस्सी बोगीमा चढेपछि उनलाई सोधपुछ गर्दा उनले सबै कुरा बताएका थिए ।

सत्यमलाई मुचुल्का गरी र यकिन गरी उनको परिवारलाई हस्तान्तरण गरिने जनाईएको छ ।