जनकनन्दिनी गाउँपालिकाभित्र आजदेखि महिला नर्तक वा ओरकेष्ट्रा नचाउन नपाउनेः अध्यक्ष यादव

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकाका अध्यक्ष दिपिन देव यादवले गाउँपालिकाभित्र ओरकेष्ट्रा नचाउन नपाउने बोल्ड निर्णय लिएका छन् ।

बर्षौदेखि धनुषाका प्रशासनले समेत प्रतिबन्ध गरेको महिला नर्तक, उच्छृँगल नृत्य, ओरकेष्ट्रालाई जिल्लावासीले मगाएर नचाउँदै आएको क्रममा जनकनन्दिनी गाउँपालिकाभित्र त्यस्ता कुनै कार्यक्रम गर्न नदिने निर्णय अध्यक्ष यादवले गरेका हुन् ।

नेपाल–भारतको सीमासँगै रहेको जनकनन्दिनी गाउँपालिकाभित्र छिमेकी मुलुक भारतको विभिन्न प्रान्तबाट महिला नर्तक बोलाएर नचाउँदा यहाँको सँस्कार, सँस्कृति, मौलिकता हराउँदै गएको भन्दै अध्यक्ष यादवले सो निर्णय सर्वसहमतिले लिएको हो ।

ओरकेष्ट्रा नचाउँदा गाउँ समाजमा झै झगडा, उच्छृँगलताको समेत वातावरण सृजना भई अप्रिय घटनाहरु हुन थालेको तथ्याँकलाई मध्यनजर गर्दै अध्यक्ष यादवले मँगलबारदेखि नै लागू हुने गरी ओरकेष्ट्राको नाममा महिला नर्तकहरुलाई गराईने सम्पूर्ण प्रकारको कार्यक्रम पूर्णतः बन्द गरिएको हो ।

यसको लागि ईलाका प्रहरी कार्यालय खजुरीले, सशस्त्र प्रहरी खजुरीले निगरानी बढाउने छ भने ओरकेष्ट्रा नचाएको खण्डमा प्रचलित कानुन बमोजिम कारवाही समेत गरिने जनाएको छ ।

यद्यपी, अध्यक्ष यादवले चर्को हौरन, प्राणघातक डिजेको बारेमा भने जिकिर गरेका छैनन् । डिजे आतंकले स्थानीयहरु अबेर रातीसम्म आतंकित हुँदै आएको छ ।