कमला नगरपालिकाको पर्सामा भव्य कृष्णाष्टमी मेला आयोजना

न्यूज ब्यूरो, जनकपुरधाम । पूर्वी धनुषाको कमला नगरपालिकास्थित भव्य कृष्णाष्टमी मेलाको आयोजना गरिएको छ । कमला नगरपालिका वडा नं. ३ पर्सा टोलस्थित कृष्णाष्टमीको अवसरमा पहिलो पटक भव्य मेलाको आयोजना गरिएको हो ।

पर्सामा बर्षौदेखि लाग्दै आएको मेला यसपाली भव्य रुपमा मनाउने भएको छ । कमला नगरपालिका वडा नं.३ स्थित प्रदेश सरकारको बजेटमा निर्माण गरिएको कृष्ण मन्दिरमा कलश भराई गराई भोली विहिबार भव्य मेलाको आयोजना गरिएको हो । यद्यपी, बर्षौदेखि सो गाउँमा एउटा मेला लाग्दै आएको थियो ।

कमला नगरपालिकाभरिमै कृष्णाष्टमी पर्सामा भव्य रुपमा मनाईदै आएको छ । बुधबार बिहान मन्दिर पूजनको लागि कलश यात्रा गरिएको हो । गाउँभरिका किशोरी, महिलाहरुले बछराजा नदीबाट जल भरी कलश भरिएको वडाध्यक्ष यादवले जानकारी दिए ।

उनले प्रदेश सरकारको बजेटमा स्थानीयहरुको माग अनुसार कृष्ण मन्दिरको निर्माण गरी भव्य पूजाआजासहित मेलाको आयोजन समेत गरिएको बताए । सो मेला गाउँलेहरुले सामुहिक रुपमा आयोजना गरेको हो ।