पूर्व गाविस प्रधान 'जोगी' लाई काँग्रेसको झण्डा ओढाएर अन्तिम सँस्कार

न्यूज ब्यूरो, जनकपुरधाम । पँचायती व्यवस्थाको क्रममा गाविस अध्यक्ष भएका योगेन्द्र प्रसाद यादव उर्फ प्रधानलाई अन्तिम सँस्कार गरिएको छ ।

साबिकको गाउँ विकास समिति (गाविस) माचि झिटकैयाका अध्यक्ष बनेका हाल कमला नगरपालिका वडा नं. २ माचि झिटकैया बस्ने योगेन्द्र प्रसाद यादव जोगीको नेपाली काँग्रेस पार्टीको झण्डा ओढाएर अन्तिम सँस्कार गरिएको हो ।

कमला नगरपालिकाका नगर प्रमुख विशेश्वर प्रसाद यादव, उपमेयर शिला देवी मण्डल र वडा नं. २ का वडाध्यक्ष ठकु यादवले नेपाली काँग्रेसको झण्डा ओढाएर अन्तिम श्रद्धाञ्जली दिएको हो । कमला नगरपालिका वडा नं. २ को समितिमा काँग्रेस पार्टीमा यादवको लगनशिलता र पार्टीप्रतिको वफादारी दिएको भन्दै उनलाई काँग्रेसको झण्डा ओढाएर सम्मानसहित अन्तिम विदाई गरेको हो ।

विगत लामो समयदेखि दीर्घरोगी रहेका यादवलाई दुई दिन अगाडी मात्र स्वास्थ्य अवस्था बिग्रेको थियो । स्वास्थ्य अवस्था बिग्रेपछि उनलाई उपचारको लागि चितवन अस्पताल लगिएकोमा आज सोमबार बिहान करिब ३ः०० बजेको समयमा अस्पतालमै अन्तिम साँस लिएका हुन् । उनले डेढ दशक अगाडी श्रीमति गुमाएका थिए ।

पँचायती व्यवस्था कालमा उनी गाविस अध्यक्षमा निर्वाचित भएको हुनाले गाउँस्तरमा हुने मेलमिलाप, पँचायतको लागि उनलाई निर्णायकको रुपमा सम्मान दिँदै आएको थियो । माचि झिटकैया, पर्सा, लगमा, मानपट्टि, सराबे, तेलियाहा, बिजुलिया, खजुरी लगायत आसपाका गाउँमा उनको बेग्लै रुतवा कायम रहेको थियो ।

स्थानीय तह निर्वाचनपछि पुनः पार्टीमा सक्रिय भएका जोगी यादवले राजनीतिक ब्यालेन्स बनाउने पात्रको रुपमा परिचित थिए । पार्टीभित्र हुने विभिन्न मनमुटाव, असहमतिलाई निर्णायकको रुपमा निर्णय गर्न उनलाई पार्टीले अघि सार्दै आएको थियो ।

यादवलाई उनको आफ्नै पैतृक गाउँ माचि झिटकैयामा अन्तिम सँस्कार गरिएको हो । उनको ६४ बर्षको उमेरमा असमायिक मृत्यू भएको हो । असमायिक मृत्यूपछि सिँगो टोल शोकमग्न भएको छ ।