मिर्चैयाः छिनछिनमा बत्ती जाने समस्याले उपभोक्ता हैरान

बिनय यादव/न्यूज ब्यूरो, सिरहा, १० जेष्ठ । मुलुक लोडसेडिङ मुक्त देश घोषणा भइसक्दा पनि सिरहाको मिर्चैया लगायतका क्षेत्रमा विजुलीको लाइन छिनमै आउने र छिनमै जाने समस्याबाट स्थानीय बासिन्दाहरु हैरान बनेका छन् ।

विजुली दिनमा १५ पटक भन्दा बढी जाने र आउने समस्याले यहाँका उद्योगी, व्यवसायी मात्र हैन आम सर्वसाधारणसमेत आजित बनेका हुन् ।

गएको आँधीबेहरीका कारण विभिन्न स्थानमा क्षति पुगेका पोल तथा जोखीम पूर्ण अवस्थामा रहेका तार मर्मतसम्भारको काम कछुवा गतिमा हुँदा समस्या हुने गरेको छ । फिल्डमा खटाइएका कर्मचारीले प्रसारण लाइनमा के समस्या भएको भन्ने बारेमा चासो नलिँदा समस्या भएको उपभोक्ताहरु बताउँछन् ।

यता, नेपाल विद्युत प्राधिकरण मिर्चैया वितरण शाखाका प्रमुख शिवराम यादवसँग कुरा गर्दा उनलेे आँधीबेहरीले यस वितरण केन्द्र अन्तर्गत रहेका विभिन्न स्थानका पोलहरुमा क्षति पुर्‍याएपछि हालसम्म बिजुली नजोडिएको ठाउँमा बिजुली जोड्दा लाइन काट्नु परेको बताए ।