जनकपुरः बासी खाना दिएपछि छोराले जलाइदिए आफ्नै आमा

न्यूज ब्यूरो, जनकपुरधाम । बासी खाना दिएको भन्दै एक छोराले आफ्नै सौतेनी आमालाई आगो लगाएर जलाइदिएका छन् । यो घटना धनुषा जिल्लाको हो ।

धनुषा जिल्लाको गणेशमान चारनाथ नगरपालिका वडा नं. ४ स्थित बासी खाना दिएको भन्दै आमालाई मारेर जलाउने एक युवकलाई धनुषा प्रहरीले पक्राउ गरी सार्वजनिक गरेको छ ।

शनिबार दिउँसो १२ बजेको समयमा काम गरी घरमा खाना खान आएको बेला सौतेनी आमा रहेकी बर्ष ३९ की मिरा देवी भगतले बासी खाना दिएको , बासी खाना नखाने बरु होटेलमा गएर खाने भनेपछि बुवाको नामले गाली गरेपछि आमालाई चिरपटले हिर्काएको बयान रेकर्ड गरिएको छ ।

जिल्ला प्रहरी कार्यालय धनुषाले पत्रकार सम्मेलन गरी आमासँग मुखामुख बोल्दा आमाले गाली गरेका, आमालाई हिर्काउँदा आमाले समेत हिर्काउन खोजेपछि चिरपट लिएर पियुठमा हान्न खोजेपनि टाउको लागेपछि तत्कालै मृत्यू भएको जनाइएको छ । तत्कालै मृत्यू भएपछि घटना ढाकछोप गर्नको लागि त्यहाँ रहेको कपडाहरु मृतकको शवमाथि हालेर आगो लगाईदिएको बयान स्वीकार गरेका छन् ।

प्रहरीको अनुसार उनीहरु भारतको बिहार राज्य नरकटियागँज बस्ने तथा कामको शिलशिलामा नेपाल बस्दै आएको बताईएको छ । छोरा प्रेम कुमार भगत लाई पक्राउ गरी अनुसन्धान प्रक्रिया अगाडी बढाइएको हो ।