सिरहाः वडा कार्यालयको शिलालेखमा आफ्नो नाम नराखेको भन्दै जँगिए पूर्व वडाध्यक्ष

न्यूज ब्यूरो, सिरहा । सिरहाको नरहा गाउँपालिका वडा नं. २ मा वडा कार्यालयको उदघाटनपछि विवाद सुरु भएको छ ।

नरहा गाउँपालिका वडा नं. २ मा नव निर्मित वडा कार्यालयको भवनको शिलालेखमा पूर्व मन्त्री एवम् एमालेका नेता लीलानाथ श्रेष्ठ, गाउँपालिका अध्यक्ष राम प्रमोद यादव र वडा नं. २ की वडाध्यक्ष सम्झना सिँहले आफ्नो मात्र नाम राखेपछि विवाद भएको छ ।

सो वडाका पूर्व वडाध्यक्ष ज्ञानदेवसिँह दनुवारले आफ्नो कार्यकालमा शिलान्यास भएको सो वडा कार्यालयको भवनको शिलालेखमा जग्गादाताको पनि नाम हुनुपर्ने माग गर्दै जिल्ला प्रशासन कार्यालय सिरहामा ज्ञापन पत्र समेत बुझाएका छन् ।

सर्वदलिय बैठकबाट वडा कार्यालय भवनको शिलालेखमा जग्गादाताको नाम हुनुपर्ने जिकिर गर्दै सिडिओलाई ज्ञापन पत्र बुझाएका हुन् । उनीहरुले सो शिलालेख फोडेर जग्गादाताको नाम लेख्नुपर्ने अडान लिएका छन् ।

पूर्व वडाध्यक्षको कार्यकालमा निर्माणधीन रहेको सो वडा कार्यालय नयाँ वडाध्यक्षको पालामा पूर्णतः निर्माण भई उदघाटन गर्दा नयाँ वडाध्यक्षको नाम हालेको भन्दै पुरानो वडाध्यक्षले विरोध जनाएका छन् ।