योजनाको फाईलमा अख्तियार लागेपछि साइन गरेनौँ, वडाध्यक्षले कमिशनको झुठो आरोप लगाएः उपमेयर सिँह

न्यूज ब्यूरो, जनकपुरधाम । धनुषा शहिदनगर नगरपालिकामा अहिले जनप्रतिनीधिहरुबीचको टशन जारी छ । शहिदनगर नगरपालिका वडा नं. ३ का वडाध्यक्ष र नगर उपप्रमुखबीच टशन चलेको छ ।

मँगलबार एक पुरानो फाईलमा साइन गर्नको लागि कमिशन मागेको आरोप लगाएका वडा नं. ३ का वडाध्यक्ष मनोज दासमाथि उपमेयरले पनि आरोप प्रहार गर्दै उनको आरोपलाई खण्डन गरेकी छन् ।

उपमेयर सुनिता सिँहले पिसिसि ढलानको फाईलमा अख्तियार लागेपछि आफू तत्कालै साईन नगरेको स्पष्ट पारेकी छन् । उनले अख्तियारले नापजोख गरी लगेपनि भुक्तानीको लागि कुनै क्लीयरेन्स नदिएको भन्दै आफूले सो फाईल पेन्डिँग गरेको बताएकी छन् ।

न्यूज ब्यूरोसँग कुराकानी गर्दै उपमेयर सिँहले अख्तियार लागेको फाईलमा आफू साइन गर्न हिच्कीचाएको बताइन् । वडा नं. ३ अन्तर्गत पर्ने यो पिसिसि ढलानको योजनामाथि अख्तियारमा मुद्दा परेपछि उनले साइन नगरेको प्रष्टयाएकी छिन् ।

उनले वडाध्यक्षले लगाएको कमिशनको आरोप सरासर गलत र चरित्र हत्या गर्ने तथ्य रहेको बताउँदै वडाध्यक्षको आरोपप्रति खेद प्रकट गरिन् । उनले एक वडाको वडाध्यक्ष भएर निराधार मिथ्या र चरित्र हत्या गर्ने आरोप लगाएकोप्रति आपत्ति प्रकट गरिन् ।

उनले कहिले कतै कमिशन मागेको, अतिरिक्त रकम मागेको, घुस मागेको, पैसा मागेको तथ्य वा प्रमाण दिए कानुन बमोजिम सहने बताइन । उनले प्रमाण दिन वडाध्यक्ष दासलाई चुनौति समेत दिइन् ।

यता, वडाध्यक्ष दासले वडा नं. ३ को कुनै पनि फाईलमा साइन नै गर्न नखोजेको आरोप लगाएका छन् । दलगत हिसाबले उपमेयर सिँह फाइलमा साइन गर्न नखोजेको बताए । उनले मेयरसँग मत नमिल्दा आफूलाई बीचमा मोहरा बनाएको आरोप लगाए । मेयरप्रति आक्रोस आफूमाथि उतार्न उपमेयर सिँहले वडा नं. ३ को कुनै पनि फाइलमा साइन नै गर्न नचाहेको बताए ।

वडाध्यक्ष दासले अख्तियारमा मुद्दा नै नभएको फाईलमा क्लीयरेन्स किने दिने भन्दै प्रश्न तेर्साए । उनले मुद्दा नै नलागेको अवस्थामा कसरी क्लीयरेन्स दिने भनेर उपमेयरसँग प्रश्न गरे । फाईलमा चेकजाँचपछि अख्तियारले भुक्तानी दिन भनेपनि आनाकानी गरेको बताए ।