पहिलो पटक कालोपत्रे (पीच) सडक बनाउँदै जनकनन्दिनी गाउँपालिका

न्यूज ब्यूरो, जनकपुरधाम । पूर्वी धनुषाको जनकनन्दिनी गाउँपालिकामा प्रथम पटक गाउँपालिकास्तरीय बजेटबाट कालोपत्रे अर्थात पीच सडक बन्न सुरु भएको छ ।

जनकनन्दिनी गाउँपालिको आर्थिक लगानीमा गाउँपालिका अध्यक्ष दिपिन देव यादवले कालोपत्रे सडक बनाउन पहल गरेका थिए । गाउँपालिकास्तरबाट प्रथम पटक सो गाउँपालिकामा पीच सडक निर्माण हुन लागेको हो ।

शनिबार एक कार्यक्रमबीच गाउँपालिका वडा नं. ६ कठालको बौसी टोलस्थित सडकको शिलान्यास गरेको हो । गाउँपालिका अध्यक्ष दिपिन देव यादव, उपाध्यक्ष कमला सहगल, वडा नं. ६ का वडाध्यक्ष सूर्यदेव यादवले सँयुक्त रुपमा सडक शिलान्यास गरेका छन् ।

गत बैशाख ११ गते टेन्डर निकाल्दै जनकनन्दिनी गाउँपालिकाले २ किलोमिटर भन्दा अधिक लामो बन्न लागेको कालोपत्रे सडकको लागि राजदेवी आदर्श जेभि कम्पनीलाई ठेक्का परेको हो ।

कमला नदीस्थित निर्माणधीन रहेको झोलुँगे पुलको सडक सँजालसँग जोडदै कठाल टोलको वडा कार्यालयसम्म तत्कालै पीच सडक बन्ने भएको छ । जसको लागि गाउँपालिकाले ३ करोड २० लाख रुपैयाँ विनियोजन गरेको छ ।

सो सडक ईनरबा–कठाल सडक सँजाल भनिएको छ । नेपाल भारतको सीमादेखि आम नागरिकलाई निर्धक्क आवतजावत गर्नको लागि कालोपत्रे सडक बनाउन लागिएको गाउँपालिका अध्यक्ष यादवले बताए । उनका अनुसार, विगतमा भएका कमिकमजोरीलाई आत्मसात गर्दै स्थानीयहरुको जनभावना बमोजिम गाउँस्तरमा कालोपत्रे सडक बनाउन लागिएको हो ।

आगामी आर्थिक बर्षमा सोही सडकलाई विस्तार गरी उदहा हुँदै सदरमुकाम खजुरीसम्म जोडने योजना रहेको अध्यक्ष यादवले बताए ।

शिलान्यासको लागि वडा नं. १ का वडाध्यक्ष सँतोष गोईत, वडा नं. २ का वडाध्यक्ष अब्दुल मालिक “रखु”, वडा नं. ३ का वडाध्यक्ष विष्णुदेव साह, वडा नं. ४ का वडाध्यक्ष दिलीप यादव, वडा नं. ५ का वडाध्यक्ष अशोक मण्डल वडा नं. ६ का वडाध्यक्ष सूर्यदेव यादवसहित सबै वडाका वडासदस्यहरु, प्राविधिक शाखाका मुकेश कुमार मण्डलसहित स्थानीय बुद्धिजीवी, समाजसेवीहरुको सहभागीता रहेको थियो ।

धमाधम शिलान्यासः
जनकनन्दिनी गाउँपालिकामा अहिले शिलान्यासको कार्यक्रम धमाधम हुन थालेको छ । आर्थिक बर्षको चापले बिलम्ब भएका योजनाहरुलाई फटाफट निरन्तरता दिन थालेको छ ।

सोही क्रममा शनिबार नै जनकनन्दिनी गाउँपालिका वडा नं. ४ खजुरी परसाहास्थित रामकिशोरको शालिकदेखि मुस्लिम टोल पस्ने सडकमा कलभर्टको शिलान्यास गरिएको छ । गाउँपालिका अध्यक्ष यादव र उपाध्यक्ष सहगलको सँयुक्त बजेटमा सो कलभर्ट निर्माण हुन लागेको हो ।

बुधबार मात्र खजुरीस्थित विद्यालयको भवन शिलान्यास गरिएको थियो ।