जनकपुरः प्रहरी असई मियाँमाथि स्थानीयहरुको ढुँगामुढा

न्यूज ब्यूरो, जनकपुरधाम । धनुषाको एक प्रहरी चौकीका असईमाथि स्थानीयहरुले ढुँगामुढा गरेका छन् । धनुषाको धनौजी गाउँपालिका वडा नं.४ भडरियास्थित रहेको प्रहरी चौकीका असई रजक मियाँ माथि ढुँगामुढा गरिएको हो ।

साँझ करिब ७ बजेको समयमा भारतबाट घरायसी समान ल्याउँदे गर्दा असई मियाँले रोकेर पैसा मागेपछि विवाद भएको थियो । तस्करलाई लाईन दिएका असई मियाँले सर्वसाधारणलाई घरायसी समानको लागि रोकेपछि विवाद हुँदा स्थानीयहरुले असई मियाँ र प्रहरीचौकीमाथि ढुँगामुढा गरेको हो ।

तस्करहरुको लाखौँको समान निर्वाध छिराउने असई मियाँले सर्वसाधारणले पाँच सय रुपैयाँको घरायसी समान ल्याउँदा पक्राउ गर्ने प्रवृतिको विरोध गर्दै स्थानीयहरुले ढुँगामुढा गरेको हो । दर्जनौँको सँख्यामा गएका स्थानीयहरुले ढुँगामुढा गरेपछि जिल्ला प्रहरी कार्यालय धनुषाबाट दुई भ्यान प्रहरी गएर अवस्था नियन्त्रणमा लिएको थियो ।

तस्कर र व्यापारीहरुसँग सेटिँग मिलाएका असई मियाँले सर्वसाधारणहरुबाट १० देखि १०० रुपैयाँसम्म लिने गरेका छन् । तस्कर र व्यापारीहरुबाट भने समान अनुसार १ लाखदेखि ४ लाख रुपैयाँसम्म महिनावारी लिने गरेको आरोप छ ।

“यहाँ ट्रयाक्टर, मोटरसाईकल, ट्रिपरमा पनि लाखौँको समान भित्रिन्छ, हामी यहीका हौँ, हामी सबै हेरिरहेको छु, तर हामीले घरको लागि २ किलो प्याज, लसुन, तेल ल्याउँदा समातेर सिधा भन्सार बुझाउने गरेको छ । भन्सार छलीको लाखौँको समान आउँछ, हामी यही हेर्छौ, फोटो, भिडियो सबै खिच्छौँ , तर उनीहरुलाई ईसारा दिएर पास गराउँछन, हामीलाई समात्छन् ।”– स्थानीयहरुले भने ।

धनौजी नाकामा प्रहरी, भन्सार कर्मचारीको पनि निगरानीमा लाखौँको समान भित्रिएपनि केही नबोल्नेहरु केही सयको समान ल्याउँदा पक्राउ गर्दा आफूहरु विरोध जनाएको बताइएको छ ।

आज शनिबार ११ बजे प्रहरीचौकीमा सर्वदलिय र स्थानीयहरुको बैठक बोलाइएको हो । स्थानीयहरुले गाउँमा प्रहरी चौकी नराख्ने अडानमा रहेका छन् ।