शहिदनगरको डुमरियामा प्रदेश साँसद यादवले गरे विद्यालय भवनको शिलान्यास

न्यूज ब्यूरो, जनकपुरधाम । धनुषा जिल्लाको निर्वाचन क्षेत्र नं. २ को डुमरियास्थित विद्यालय भवनको शिलान्यास गरिएको छ । प्रदेश साँसद एवम् समाजसेवी राम अशिष यादवले सोमबार सो विद्यालयको भवन शिलान्यास गरेका हुन् ।

शहिदनगर नगरपालिकाको वडा नं. ८ डुमरियास्थित रहेको श्री राष्ट्रिय प्राथमिक विधालयको भवन शिलान्यास गरेका हुन् । निर्वाचन क्षेत्र नं. २ (ख) पर्ने डुमरियाको सो विद्यालयमा २५ लाख रुपैयाँ लागतमा विद्यालय भवन बनाउन लागेका हुन् ।

समृद्धिको प्रवेशद्धार नै शिक्षा रहेको मूल नारासहित साँसद यादवले सँसदीय विकास कोषबाट २५ लाख रुपैयाँ दिएर विद्यालयको भवन निर्माण गर्न लागेका हुन् । वि.सं. २०४४ सालमै स्थापित भएको सो विद्यालय तत्कालिन गाविस अध्यक्ष एवम् समाजसेवी रामसेवक बनरैतले ४ कठ्ठा जमिन प्रदान गरेका थिए ।

बालविकासदेखि कक्षा ६ सम्म सँचालनमा रहेको सो प्राथमिक विद्यालयमा करिब अढाई सय बालबालिकाहरु अध्ययनरत रहेको बेला भवन अभाव भएको गुनासोपछि साँसद यादवले चासो लिएका थिए । प्रधानाध्यापक रामबाबु यादवको आग्रहमा साँसद यादवले विद्यालय भवन निर्माणको लागि अग्रसर भएका थिए ।

शिलान्यास कार्यक्रममा शहिदनगर नगरपालिकाका मेयर दिनेश प्रसाद यादवसहित समाजसेवी, स्थानीयहरुको समेत सहभागीता रहेको थियो ।