हँसपुर नगरपालिकामाथि लोसपाको धावा, विकासमा आर्थिक चलखेल भएको मेयरलाई १५ दिने अल्टिमेटम

न्यूज ब्यूरो, जनकपुरधाम । धनुषाको हँसपुर नगरपालिकामा आर्थिक चलखेल भएको भन्दै लोकतान्त्रिक समाजवादी पार्टी (लोसपा) ले सूचना उपलब्ध गराइदिन माग गरेको छ ।

लोसपाका नगर अध्यक्ष लालबाबु यादवले विभिन्न २२ बुँदे माग राख्दै पादर्शीताको माग उठाएको हो । यादवले हँसपुर नगरपालिकाका मेयर प्रदिप यादवलाई त्यसको बारेमा जानकारी गराउँदै १५ दिने अल्टिमेटम दिएको हो ।

कृषि प्रयोजनको लागि खरिद गरिएको औषधी छर्किने ट्यान्की असल किसानलाई नदिएर आफ्ना नातागोता र पार्टीका कार्यकर्ताहरुलाई मात्र दिएको गुनासो गरिएको छ । कृषिमा पाकेट खेतीको लागि आएको रकम खेतीमा लगानी नै गरी कागजी काम गरी रकम अनियमितता गरेको समेत आरोप लगाइएको छ ।

कृषि विद्युतियकरणको लागि खरिद गरिएको पोल–तार विद्युतिकरणमा नलगाई आफ्नै आसेपासे र परिवारको लगाएको तथा बिल भन्दा कम समाग्री खरिद गरी अनियमितता गरेको आरोप छ ।

छठ पर्वमा गरिब, विपन्न निमुखाहरुको गहुँ, गुड, साडी, अर्धको समान खरिद गर्न छुटयाएको १० लाख रुपैयाँ वितरण नै नगरी रकम निकासा गरेको आरोप छ । जेष्ठ नागरिक कार्यक्रममा समेत अनियमितता गरिएको आरोप छ ।

विद्यालयको लागि आएको अनुदान रकम, छात्रवृति विद्यालयमा नपठाई अनियमितता गरेको, विभिन्न वडामा सँचालनको नाममा अनियमितता गरेको , आवश्यकता भन्दा अधिक कर्मचारी ज्यालादारीमा राखिएको लगायतको २२ बुँदे माग अघि सारेको हो ।

यसको लागि मेयर यादवलाई १५ दिने अल्टिमेटम दिँदै सो अवधिभित्र उपलब्ध नगराई सम्बन्धित निकायमा ध्यानाकर्षण गराउने चेतावनी समेत दिएको हो ।