मोदीको जनकपुर भ्रमण : जानकी मन्दिरमा आज दुई ऐतिहासिक कार्यक्रम

न्यूज ब्यूरो |
जनकपुरधाम, २८ बैशाख । मोदीमय बनेका जनकपुरको जानकी मन्दिरमा आज दुई कार्यक्रमको तालिका सार्वजनिक गरिएको छ ।

प्रधानमन्त्री केपी शर्मा ओली र भारतीय प्रधानमन्त्री नरेन्द्र मोदीको जानकी मन्दिरमा दुई वटा कार्यक्रम हुने भएको छ ।

जानकी मन्दिरमा प्रधानमन्त्री ओलीले भारतीय समकक्षी मोदीलाई स्वागत गरेपछि सँगै विशेष पुजा पाठ गर्ने छन् ।

पुजापाठपछि उनीहरु जानकी मन्दिरको बाहिरी परिसरमा जनकपुरधाम–अयोध्याबीचको सोझो बस सेवाको शुभारम्भ गर्ने छन् ।

उनीहरु त्यहाँ नै पर्यटकीय क्षेत्रका लागि अत्यन्त महत्वपूर्ण मानिएको रामायण सर्किटको ‘लञ्च’ गर्ने छन् ।

त्यसपछि प्रधानमन्त्री ओली छुट्टिएर काठमाण्डुका लागि प्रस्थान गर्ने छन् ।

मोदी जानकी मन्दिरमा थप केहि समय रहन सक्ने संभावना छ ।मोदीको भ्रमणको प्रमुख दुई कार्यक्रम मध्ये जानकी मन्दिरको विशेष मानिएको छ ।

मोदीलाई विमानस्थलमा रक्षा मन्त्री ईश्वर पोखरेल, मुख्यमन्त्री लालबाबु राउत, प्रदेश सभामुख सरोज कुमार यादव, प्रदेशका मन्त्री र राज्यमन्त्रीहरु सहितले स्वागत गर्ने छन् । विमान स्थलमा मोदी स्वागतग्रहण गर्दै जानकी मन्दिरका लागि प्रस्थान गर्ने छन् ।

जानकी मन्दिरमा उनको स्वागतका लागि प्रधानमन्त्री ओली रहने छन् ।ओलीसँगै जानकी मन्दिरमा महन्थ रामतपेश्वर दास वैष्णव, उत्तराधिकारी महन्थ रामरोशन दास वैष्णव लगायतले स्वागत गर्ने छन् ।ओली हेलिकोप्टरबाट जनकपुर चुरोट कारखानाको खेल मैदानमा ओर्लेर जानकी मन्दिर पुग्ने छन् ।

मोदी आउनु भन्दा केहि अगावै ओली जानकी मन्दिर पुगिसक्ने बताईएको छ ।जानकी मन्दिरमा मुख्यमन्त्री राउतपनि रहने छन् ।

बारहबिघामा आयोजित हुने नागरिक अभिनन्दनमा भारतीय प्रधानमन्त्री मोदीलाई १ सय २१ किलोको माला लगाईने छ ।

प्रदेश सरकारको तर्फबाट उनलाई मालाले स्वागतगर्दा प्रदेशका मन्त्री, राज्यमन्त्रीहरु समेत सहभागि रहने एकजना मन्त्रीले जनाए ।

उपमहानगर पालिकाले अभिनन्दन गर्नेछ । अभिनन्दन समारोहमा केहि लाख मानिसहरुको सहभागिता रहने प्रदेश सरकारका कृषी मन्त्री समेत रहेका जनपरिचालन समितिका संयोजक शैलेन्द्र प्रसाद साहले भने, ‘सबै जिल्लाहरुबाट भारी संख्यामा सर्वसधारण मोदीको भाषण सुन्न आउने छन् ।

सवारी साधनहरुको प्रयाप्त व्यवस्था मिलाईएको जनाउँदै उनले अभिनन्दन समारोहमा सहभागि हुनेहरुका लागि प्रवेश सहज बनाइएको आजको जनकपुर टुडेमा समाचार प्रकाशित गरिएको छ ।