नगरपालिका कार्यालय आउने विपन्न सेवाग्राहीलाई न्यानो कम्बल दिएर सेवा दिँदै मेयर यादव

न्यूज ब्यूरो, जनकपुरधाम । धनुषाको शहिदनगर नगरपालिकाका मेयर दिनेश प्रसाद यादवले नगरपालिकामा सेवा लिन आउने सेवाग्राहीलाई न्यानो कम्बल दिएर सेवा दिने गरेका छन् ।

तराईमा बढदै गरेको शितलहरको कारण चिसोमा सेवा लिन नगरपालिका कार्यालय आउने गरेका विपन्न सेवाग्राहीहरुलाई न्यानो कम्बल दिएर पठाउने गरेका छन् ।

यदुकूहास्थित रहेको नगरपालिकाको कार्यालयमा सेवा लिन विभिन्न वडाबाट आउने विपन्न सेवाग्राहीहरुलाई सम्मानसहित चिसोबाट बचाउन न्यानो कम्बल दिन थालेका छन् ।

दुरदराजका वडाबाट आउने मोटो कपडा नभएको सेवाग्राहीहरुलाई केन्द्रीत गरी नगरपालिका कार्यालयमै न्यानो मोटो कम्बल दिन सुरु गरिएको मेयर दिनेश प्रसाद यादवले जानकारी दिए ।

अत्यधिक चिसोको कारण तराईसहित शहिदनगर नगरपालिकाको जनजीवन समेत प्रभावित भएको भन्दै उनले चिसोबाट नगरवासीलाई बचाउन उनले यस्तो गरेको बताए । विपन्न, दलित, गरिब परिवारबाट सेवा लिन नगरपालिका आउनेहरुलाई न्यानो कम्बल दिने गरेको मेयर यादवले थपे ।