जनकपुरः एकाविहानै पुलचोकस्थित एक युवतिको लास !

न्यूज ब्यूरो, जनकपुरधाम । मधेश प्रदेशको राजधानी जनकपुरधाम क्षेत्रस्थित एक युवतिको लास फेला परेको छ ।

धनुषा जिल्लाको शहिदनगर नगरपालिका वडा नम्बर ३ र ४ को बीचमा पर्ने पुलचोकस्थित एकाबिहानै युवतिको लास फेला परेको हो ।

यदुकूहाको पुलचोकस्थित रहेको नहरसँगै एक झाडीमा युवतिको लास फेला परेको हो । युवति विवाहित रहेको स्थानीय प्रत्यक्षदर्शीहरुले जनाएका छन् ।

अन्दाजी २६ बर्षिय जस्तो देखिने युवति नव विवाहिता जस्तो देखिएको छ । हरियो साडी लगाएकी मृतक युवतिको सनाखत अझै भएको छैनन् ।

यदुकूहास्थित रहेको ईलाका प्रहरी कार्यालय यदुकुहाको कार्यालयदेखि केही दुरीमा युवतिको लास फेला परेको प्रत्यदर्शीहरुले जनाएका छन् ।

अहिले ईलाका प्रहरी कार्यालय यदुकूहाका प्रहरी र सशस्त्र प्रहरीको टोलीले घटनास्थललाई घेरा हालेर आम नागरिकलाई प्रवेश निषेध बनाएको छ ।

बिहान स्थानीयहरु खेतबारी तर्फ जाँदा युवतिलाई मृत अवस्थामा देखेपछि स्थानीयहरुलाई खवर गरेको थियो । स्थानीयहरुले नजिकको प्रहरीलाई जानकारी गराएपछि घटना बाहिर आएको हो ।

घटनाको अनुसन्धानको लागि प्रहरीको मुचुल्का टोली अहिले घटनास्थलमा पुगेको छ । घटनाको मुचुल्का उठाएर थप अनुसन्धान अगाडी बढाउने इलाका प्रहरी कार्यालय यदुकूहाले जनाएको छ ।

मुचुल्कापछि युवतिको लासलाई पोष्टमार्टमको लागि जनकपुरको प्रादेशिक अस्पताल पठाउने तयारी समेत गरिएको प्रहरीले जनाएको छ ।