जनकपुरः गाउँ पसेर एउटै स्याल ४ जनालाई काटे, गाउँमा त्रास !

न्यूज ब्यूरो, जनकपुरधाम । मधेश प्रदेशको राजधानी जनकपुरधाम क्षेत्रस्थित एउटै गाउँका चारजनालाई स्यालले टोकेपछि स्थानीय त्रसित भएका छन् ।

जनकपुरधाम क्षेत्रमै पर्ने महोत्तरीको पिपरा गाउँपालिका वडा नम्बर ६ मा एउटै स्यालले टोक्दा स्थानीय चारजना घाइते भएका छन् ।

घाइते हुनेहरूमा पिपरा गाउँपालिका रतौलीका १६ वर्षीय बबन चौधरी, ६५ वर्षीय सोनावती सदा रहेका छन् । त्यस्तै, सोही टोलकी १३ वर्षीय रेणु कुमारी सदा र ३५ वर्षीय पुनमदेवी सोनारलाई पनि स्यालले टोकेको हो ।

एउटै स्यालले उनीहरूलाई टोकेको हो । स्याल बहुला भएको हुनसक्ने स्थानीयले बताए ।

सामान्यतया रातिमा मात्रै देखापर्ने स्याल दिउँसै गाउँ पसेर टोक्न थालेपछि स्थानीय त्रसित भएका छन् ।

घाइते चारै जनाको जनकपुर प्रादेशिक अस्पतालमा उपचार भइरहेको छ ।