दाइजोको निहुँमा एक महिना न-बित्दै श्रीमतीको हत्या

न्यूज ब्यूरो, रौतहट | वृन्दावन नगरपालिका वडा नं–६ सिसवा धमौराकी दाइजोका कारण नवविवाहित युवतीको हत्या भएको आरोप माइती पक्षले लगाएको छ ।

जिल्लाको कटहरिया नगरपालिका वडा नं–५ बलिरामपुर माइती भई सिसवा धमौरामा विवाह भएकी २० वर्षीया सविता भनिने सञ्जुकुमारी दासको दाइजोका कारण हत्या भएको आरोप माइती पक्षले लगाएको हो। गत सोमबार घाँटी कसेर सञ्जुको हत्या भएको उनीहरूले दाबी गरेका हुन्।

मृतक सन्जुका माइतीले बिहीबार साँझ घरमै पत्रकार सम्मेलन गरी छोरीको हत्या भएको दाबी गरेका हुन्। आफूहरूसँग पटक–पटक दाइजो स्वरुप रकम माग्ने गरेको र रकम नदिएका कारण हत्या भएको उनीहरूको भनाइ छ।

ससुरा चन्देश्वर दास र श्रीमान रमाकान्त दासको मिलेमतोमा सासू शिवा देवी, देवर उमाकान्त दास, नन्द रञ्जना दास, ठूला ससुरा विन्देश्वर दासले साउन २ गते बेलुका सन्जुको हत्या गरेको मृतकका बुबा रामचन्द्र दासले आरोप लगाए।

उनले इलाका प्रहरी कार्यालय गरुडामा जाहेरी दिन खोज्दा समेत प्रहरीले जाहेरी लिन नमानेको बताए। प्रहरीले उनीहरूविरुद्ध जाहेरी लिन नमानेको भन्दै आक्रोश पोखे।

जातीय परम्परा अनुसार एक महिनाअघि २०७९ असार ६ गते रमाकान्तसँग सन्जुको विवाह भएको थियो। विवाह भएलगत्तै दाइजो नल्याएको भन्दै छोरीलाई मानसिक तथा शारीरिक यातना दिने गरेको रामचन्द्रले बताए।

सन्जुको बिहेमा दाइजोकै विषयलाई लिएर विवाद भई केटा र केटी पक्ष बीच कुटाकुटको घटना समेत भएको थियो। पछि विवाद मिलाएर विवाह सम्पन्न भएको थियो। बिहेको दिनदेखि नै सन्जुले घरमा यातना पाएको माइती पक्षको आरोप छ।

हत्या भएको दिन साँझ करिब ६ बजेको समयमा सन्जुसँग इमोमा कुरा भइरहँदा गाली गरेर फोन काट्न लगाएको आमाले बताइन्। केही बेरमा सन्जुकी ठूली दिदीले इमोमा फोन गर्दा फोन रिसिभ भएको र सन्जु झुण्डिएको अवस्थामा देखिएकी थिइन्।

लगत्तै आफूहरू सञ्जुको घर पुग्दा उनलाई घरको बरण्डामा सुताएर राखेको थिए। स्थानीय बासिन्दाले समेत दाइजो नदिएका कारण सन्जुको हत्या भएको हुनसक्ने बताएका छन्।

इलाका प्रहरी कार्यालय गरुडाका डीएसपी बरुण सिंहसँग बुझ्दा पोस्टमार्टमको रिपोर्ट आउन बाँकी रहेको र घटना बारेमा अनुसन्धान भइरहेको बताए।