मटिहानीमा बोरामा कोचेर फालिएको अवस्थामा लास भेटियो

राजनिश झा ||
जनकपुरधाम, २१ चैत्त ।
महोत्तरीमा बोरामा कोचेर फालिएको अवस्थामा एक महिलाको शव फेला परेको छ ।

मटिहानी नगरपालिका वडा नं. ४ मझौरा स्थित मुख्य सडक छेउमा मंगलबार राती शव फालिएको खबर पाएपछि बुधवार बिहान जिल्ला प्रहरी कार्यालय महोत्तरीको अनुसन्धान टोली घटना स्थल पुगेर शवको मुचुल्का उठाएको छ ।

मृतक महिला मटिहानी नगरपालिका वडा नं। ४ वरदाहाकी २५ वर्षीया पुनम देवी तत्मा रहेको प्रहरीको प्रारम्भिक अनुसन्धानबाट खुलेको छ ।

मृतकका श्रीमान् शिवशंकर दास गत १६ गते मात्र वैदेशिक रोजगारीबाट फर्केका थिए ।

१८ गते राती देखि नै छोरी हराएको भन्दै माइती पक्षले प्रहरीमा खोजविन गरि पाउँ भनि मौखिक र लिखित उजुरी समेत दिएपछि प्रहरी खोजविनमा लागेको थियो ।

यता मृतकको घर पक्षबाट देवर फुलेन्द्र दास तत्माले समेत भाउजु गरगहना र पैसा लिएर घरबाट हराएको भनेर प्रहरीलाई जानकारी गराएको प्रहरीको भनाई छ ।

मृतक महिलाको ४ र ३ वर्षको दुई छोरी छन् । आमाको शव भेटिएसँगै बुवा तथा परिवारका अन्य सदस्यहरु फरार भएपछि दुई छोरी छिमेकीको हेरविचारमा रहेका छन् ।

हत्या कसरी र कसले गर्यो सो अनुसन्धान र पोष्टमार्टम रिपोर्ट पछि मात्र थाहा हुने प्रहरी निरीक्षक केदार बस्नेतले बताए ।