हँसपुर नगरपालिकाको वडाध्यक्ष कापरीले खाए पोखरीको ११ लाख रुपैयाँ राजस्व, रकम बुझाउन पत्राचार

न्यूज ब्यूरो, जनकपुरधाम । धनुषाको हँसपुर नगरपालिकाको एक वडाध्यक्षमाथि ११ लाख रुपैयाँ बेरुजु आएपछि उनलाई नगरपालिकाले रकम फिर्ता गर्न पत्राचार गरेको छ ।

हँसपुर नगरपालिका वडा नम्बर १ का वडाध्यक्ष कामेश्वर कापरीलाई नगरपालिकाले पत्र लेख्दै ७ दिनभित्र ११ लाख १० हजार रुपैयाँ बुझाउन पत्राचार गरेको हो ।

महालेखा परीक्षकको २०७८ को प्रतिवेदन अनुसार, दफा १०२ को उफदफा २ अनुसार कापरीमाथि ११ लाख १० हजार रुपैयाँ बेरुजु ठहर भएको भन्दै असुल उपरको लािग महालेखा परीक्षकले पत्राचार गरेको हो ।

नगरपालिकाका प्रमुख प्रशासकीय अधिकृत केशव कुमार अधिकारीले गत माघ २६ गते गरेको पत्राचारमा अख्तियार दुरुपयोग अनुसन्धान आयोगको कार्यालय बर्दिवास र जिल्ला प्रशासन कार्यालय धनुषालाई समेत बोधार्थ गरेको हो ।

वडा नम्बर १ भित्र पर्ने विभिन्न सार्वजनिक पोखरीलाई ठेक्का लगाएर राजस्वको सबै रकम आफू नै राखेपछि महालेखाले उनीउपर ११ लाख १० हजार बेरुजु ठहर गरिएको हो । विभिन्न समयमा लगाएको पोखरीको ठेक्का वापत असुल भएको सबै राजस्व राखेपछि उनीउपर बेरुजु आएको हो ।