लहान प्रहरीको अनुसन्धान अति सुस्त, खोज्न सकेनन् चोर

न्यूज ब्यूरो, सिरहा, ८ चैत्र । नेपाल पत्रकार महासंघ सिरहा शाखाका कोषाध्यक्ष एवम् हिमालीनी हिन्दी अनलाईन सिरहा-सप्तरीका सम्बाददाता मनोज बनैता यादवको लहान १ स्थित रहेको घरमा चोरी भएको २ साता भन्दाबढी भइसक्दा पनि प्रहरीले चोरलाई हालसम्म पनि समात्न नसक्दा लहान प्रहरीको सुरक्षा माथी ठुलो प्रश्न चिन्ह खडा भएको छ । पत्रकार बनैताको घरमा गत फाल्गुन २१ गते सोमबार मध्य रातमा चोरी भएको थियो ।

निजले प्रयोग गर्दै आएको ल्यापटप, मुभी क्यामेराको साथै नगदगरी लगभग २ लाख बराबरको सामान चोरी भएको थियो । चोरी सम्बन्धमा भइरहेको अनुसन्धान अति सुस्त भएकाले आगामी दिनमा लहान प्रहरी विरुद्ध प्रेस मन्च सिरहाले कडा आन्दोलन गर्ने गत फागुन २८ गते बिज्ञप्ती मार्फत चेतावनी दिइसकेका छन् । पत्रकार बनैताले घरमा चोरी भएको रिपोर्ट प्रहरीमा गरेका भएपनि यस घटनाउपर प्रहरी प्रशासनले कुनै ठोस पहलकदमी चासो नदेखाउँदा स्थानीयबासी र सिरहाका संचारकर्मीहरु समेत असुरक्षित भएको महसुस गर्छन् ।

यता, ईलाका प्रहरी कार्यालय लहानका प्रहरी नायव उपरिक्षक गणेश चन्दले चोरी सम्बन्धमा सम्पूर्ण जिम्मा लहानका इन्स्पेक्टर युगेश्वर राउतलाई दिइएको बताए । उहाँले हामी अनुसन्धानमा छौ केही दिन भित्रै चोरलाई समात्ने आश्वासन दिइरहेका छन् । मिडियाका लागि प्रयोग हुने सामग्री चोरी भएकाले यथासिघ्र पत्ता लगाई चोरलाई कानुनको दायरामा ल्याउन प्रहरी प्रशासनसंग नेपाल पत्रकार महासंघ सिरहा शाखाका अध्यक्ष दिनेश्वर प्रसाद गुप्ता लगायत सिरहाका विभिन्न मिडियाका संचारकर्मीहरुले जोडदार माग गरिरहेका छन् ।