कमला नगरपालिकाका कर्मचारीहरु आन्दोलित, तलब नदिए काममा नआउने चेतावनी

न्यूज ब्यूरो, जनकपुरधाम । पूर्वी धनुषाको कमला नगरपालिकाका कर्मचारीहरुले चार महिना बराबरको तलब नपाएको भन्दै आन्दोलित भएका छन् ।

कमला नगरपालिकाको कार्यालयभित्र काम गर्ने कर्मचारीहरुले दशैँको मुखमा समेत तलब भत्ता उपलब्ध नगराएको भन्दै काममा नआउने चेतावनी दिएका छन् ।

शुक्रबार नगरपालिकाका कर्मचारीहरुले सँयुक्त रुपमा जिल्ला प्रशासन कार्यालय धनुषा र कमला नगरपालिकाका नगर प्रमुखलाई बोद्यार्थ गर्दै कर्मचारीहरुले सँयुक्त रुपमा बुझाएको ध्यानाकर्षण पत्रमा खर्चको अख्तियारी पाएपनि तलब नदिएको गुनासो गरिएको छ ।

चाडवाडको समयमा समेत कार्यालयका निमित्त प्रमुख प्रशासकीय अधिकृत बीरेन्द्र कुमार सढानले केही कर्मचारीसँगको व्यक्तिगत रिसबी साँध्नको लागि तलब भत्ता नदिएको आरोप समेत ध्यानाकर्षण पत्रमा उल्लेख गरिएको छ ।

स्थानीय सरकार सँचालन ऐन २०७४ बमोजिम पाँचौ नगरसभा सम्पन्न भएको तथा गत असोज २० गते आर्थिक वर्ष २०७८÷७० को चलानी नम्बर ४२५ अनुसार तलब खुवाउने अख्तियारी समेत भईसकेको भएपनि तलब नदिएको गुनासो गरिएको छ ।

सबै प्रक्रिया पुगेर पनि कार्यालय प्रमुख सढानले अनाहकमा कर्मचारीलाई दुःख दिएको आरोप लगाउँदै दशैँ अघि नै तलब नदिए आगामी कुनै पनि काम कारवाही अगाडी नबढाउने चेतावनी दिएको हो ।

कार्यालयका लेखापाल सँजीव कुमार महतो, प्राविधक शाखाका अधिकृत खिलराज परियार, आन्तरिक लेखा परीक्षण शाखाका गौत्तम झा लगायतका अन्य कर्मचारीहरुले सँयुक्त रुपमा सो ध्यानाकर्षण पत्र नगर प्रमुख राम उदगार गोईत समक्ष बुझाएका छन् ।

यता, निमित्त प्रमुख प्रशासकीय अधिकृत बीरेन्द्र कुमार सढानले कागजी प्रक्रिया दुरुस्त नगरेको कारण आफू रकम खर्च गर्न असक्षम रहेको प्रतिक्रिया दिएका छन् । उनले आफूले पाएको अख्तियारी नीतिगत नरहेको तथा अवैद्यानिक रहेको भन्दै वैद्यानिकता प्रदान नभएसम्म गैर कानुनी कार्य नगर्ने दाबी गरे ।

न्यूज ब्यूरोसँगको कुराकानीमा अधिकृत सढानले तलब खुवाउनको लागि मात्र अख्तियारी दिनु नीतिगत नरहेको बताउँदै कोष तथा लेखा परीक्षक कार्यालयले अख्तियारीलाई वैद्यानिकता प्रदान नगरेसम्म गैर कानुनी तवरले कुनै पनि कार्य नगर्ने बताए ।

यसका साथै, नगरपालिकाको कार्यालयमा काम गर्ने मात्र कर्मचारीहरुको लागि कुनै पनि हालातमा तलबको लागि राजी नहुने बताउँदै नगरभित्रको सम्पूर्ण कर्मचारीहरुको लागि तलब निकासा चाँडै गर्नुपर्ने धारणा पनि राखे ।

उनले भने,–“दशैँ अहिले सबै कर्मचारीको छ । न की मात्र नगरपालिकाको कार्यालयमा कार्यरत कर्मचारीहरुको । अख्तियारी नै अवैद्यानिक छ । कोलनिकाले वैद्यानिक सदर गरे मात्र चेकमा हस्ताक्षर गर्ने र अन्य प्रक्रिया अगाडी बढाउन सक्छु । दशैँको बेला सबै कर्मचारीलाई तलबको आवश्कयता छ । मेरो मानवताले पनि मानेनन की नगरपालिकाको कर्मचारीहरुको लागि मात्र तलब निकासा गर्ने र अन्यलाई के मुख देखाउने ? ”

उनले आफू तलब निकासाको लागि सम्बन्धित निकायमा पुगेको बताउँदै नगरपालिकाभित्रको सबै शिक्षक, स्वास्थ्यका कर्मचारी लगायत अन्य सबै कार्यरत कर्मचारीहरुको तलबको लागि प्रयास थालेको बताए । उनले अख्तियारी मात्र तलब खर्चको लागि अवैद्यानिक भएको बताउँदै पूर्ण अख्तियारी नपाएसम्म गैर कानुनी कार्य गर्न बाध्य नहुने ठोकुवा गरे ।

कर्मचारीमाथि व्यक्तिगत रिसबी साँधेको सन्दर्भमा अधिकृत सढानले त्यसलाई कपोकल्पित र मिथ्या रहेको बताए । उनले आफूलाई कुनै पनि कर्मचारीसँग कुनै पनि प्रकारको कुनै रिसबी नरहेको दाबी गर्दै एक परिवारजस्तै रहेको बताए ।

अधिकृत सढानले आर्थिक बर्ष २०७७÷७८ मा विकास निर्माणको कार्य गतिलो भएको तथा कार्य सम्पादन समेत अन्य बर्षहरुको तुलनामा उत्तम भएको दाबी पनि गरे ।