धनुषाका प्रहरी एसपीको नक्कली फेसबुक आईडी बनाएर पैसा माग्दै

न्यूज ब्यूरो, जनकपुरधाम । पछिल्लो समय सामाजिक सञ्जालमार्फत हुने ठगी धन्दा बढ्दै गइरहेको देखिएको छ । विभिन्न जालझेल, प्रलोभन तथा भ्रममा पारेर नक्कली प्रयोगकर्तालाई ठग्ने प्रवृत्ति मौलाउन थालेको हो ।

यसैबीच, धनुषाका प्रहरी प्रमुख प्रकाश रानाभाटको नाममा नक्कली फेसबुक अकाउन्ट बनाएर विभिन्न व्यक्तिसँग पैसा माग्दै गरेको पाइएको छ ।

जिल्ला प्रहरी कार्यालय धनुषाका प्रमुख प्रहरी उपरिक्षक रानाभाटको नक्कली फेसबुक आइडी बनाएर कसैले ‘गुगल पे’मार्फत उनका साथीहरुसँग पैसा मागिरहेको पाइएको हो ।

प्रहरी उपरिक्षक रानाभाटले आफ्नो आधिकारिक फेसबुकमा लेखेका छन्, ‘मेरा फेसबुकका साथीहरूले मलाई सूचित गरे कि कसैले मेरो नाममा नक्कली फेसबुक आइडी खोलेका छन् र मेरा साथीहरुसँग पैसा माग्दै छन् । म मेरा सबै साथीहरुलाई अनुरोध गर्न चाहन्छु कि यो म होइन र यो धोका दिनेको बारेमा सजग रहनुहोस् तथा पैसा नदिनुहोस् ।’

एसपी रानाभाटको नाममा बनाइएको फेक अकाउन्टबाट धेरै जनालाई फ्रेन्ड रिक्वेस्ट समेत पठाउने गरेको पाइएको छ । विभिन्न बहाना देखाउँदै आफ्नो नामबाट पैसा माग्ने गरिएको उनले सुनाए ।

यसप्रकारका घटनामा साइबर अपराध नियमनका लागि विद्युतीय कारोबार ऐन, २०६३ अनुसार कारबाही हुने व्यवस्था रहेको छ । सो ऐनको दफा ४७ अनुसार कम्प्युटर, इन्टरनेटलगायत विद्युतीय सञ्चारमाध्यममा नैतिकता, शिष्टाचारविरुद्धका सामग्री, कसैप्रति घृणा वा द्वेष फैलाउने सामग्री प्रकाशन वा प्रदर्शन गरे दोषीलाई एक लाख जरिवाना वा पाँच वर्षसम्म कैद अथवा दुवै सजाय हुनसक्ने कानुनी व्यवस्था छ ।