मधेशको विभिन्न जिल्लामा डकैती गरेको आरोपमा झिझाका यी पुरुष पक्राउ

न्यूज ब्यूरो, १२ साउन । तराई मधेशको विभिन्न जिल्लामा डकैती गरेको आरोपमा धनुषाका एक युवकलाई प्रहरीले आज पक्राउ गरेको छ ।

गत वर्ष चैत्त ३० गते साँझ प्रदेश २ को सिरहा जिल्ला लहानस्थित एक सुनचाँदी व्यापारीको घरमा डकैती गरेको मुद्दाको अनुसन्धान गर्दै जाँदा उनीमाथि विभिन्न जिल्लामा मुद्दा रहेको बताइएको छ ।

सिरहाको लहान नगरपालिका वडा नम्बर ७ स्थित सुनचाँदी व्यवसायी राजेश सारडाको घरमा हतियारधारी डाँकाको समुह प्रवेश गरी उनका बुवा भगिरथ सारडा र उनको परिवारका सदस्यको कञ्चटमा पेस्तोल तेर्स्याएर सुनचाँदी लुटपाट गरेको आरोपमा पक्राउ गरिएको हो ।

धनुषाको विदेह नगरपालिका वडा नम्बर ४ ठाढी झिझा बस्ने बर्ष ४० को चन्दन पासवानलाई धनुषा प्रहरीले पक्राउ गरेको हो । सो डकैती काण्डमा फरार रहेका डाँकाहरू मध्ये पासवानलाई खोज तलाश गर्ने क्रममा मँगलबार (आज) साँझ ५ बजेको समयमा उनकै गाउँबाट पक्राउ गरिएको हो ।

तालुक २ नं. प्रदेश प्रहरी कार्यालय जनकपुरबाट खटिएको सादा पोशाकको र जिल्ला प्रहरी कार्यालय धनुषाको मातहत ईलाका प्रहरी कार्यालय खजुरी, प्रहरी चौकी ठाडिझिझा धनुषाबाट प्रहरी सहायक नीरिक्षको कमाण्डमा खटि गएको संयुक्त टोलीले आफ्नै घरमा लुकीछिपी बसिरहेको अवस्थामा पक्राउ गरिएको हो ।

उनलाई आजै ईलाका प्रहरी कार्यालय लहान पठाइएको जिल्ला प्रहरी कार्यालय धनुषाले जनाएको छ ।

साथै गत २०६७ साल साउन २९ गते रुपन्देही जिल्लाको चिल्हिया गाविस वडा नम्बर ६ स्थित फतेसिहं राणा र उत्तमकुमार क्षेष्ठको घरमा डकैति गरि फरार रहेकोमा पक्राउ परेका चन्दन पासवानमाथि जिल्ला प्रहरी कार्यालय रुपन्देही समेतमा डाँका मुद्दा दर्ता रहेको बताइएको छ ।

पासवानमाथि जिल्ला महोतरी स्थित विभिन्न डकैतिका घटनामा समेत संलग्न रहेको हुँदा उनीमाथि जिल्ला प्रहरी कार्यालय महोतरी समेतमा डाँका मुद्दा दर्ता रहेको बताइएको छ ।