वडाध्यक्षको किरिया खर्चको लागि मेयर यादवद्धारा ५ लाखको चेक हस्तान्तरण

न्यूज ब्यूरो, जनकपुरधाम । धनुषाको मिथिला बिहारी नगरपालिकाका मेयर अनिल कुमार यादवले कोरोनाका कारण मृत्यू भएका एक वडाध्यक्षको परिवारलाई ५ लाख रुपैयाँको चेक हस्तान्तरण गरेका छन् ।

शनिबार मेयर यादवले मिथिला बिहारी नगरपालिका वडा नं. ५ का वडाध्यक्ष विनोद कुमार मण्डलको मृत्यू पश्चात उनकी श्रीमतिलाई ५ लाखको चेक हस्तान्तरण गरेका छन् । उनलाई वडाध्यक्ष मण्डलको किरिया खर्च वापत सो रकम प्रदान गरिएको जनाइएको छ ।

नगरपालिकाको एक जनप्रतिनीधिको अकाल मृत्यू भएपछि पालिकाको बोर्डबाट सो रकम दिने निर्णय गरिएको थियो । सोही अनुसार, शनिबार मेयर यादवले सो रकम बराबरको चेक हस्तान्तरण गरेका हुन् ।

सो चेक मृतक वडाध्यक्षकी श्रीमति अञ्जली देवी मण्डललाई दिएको हो । वडाध्यक्षको किरिया खर्च सहित परिवार पालन तथा औषधी उपचार समेतको लागि सो रकम प्रदान गरिएको मेयर यादवले बताए । कार्यपालिका समितिको निर्णय बमोजिम सो चेक हस्तान्तरण गरिएको हो ।

कोरोनाका दोस्रो लहरको क्रममा वडाध्यक्ष मण्डलको कोरोना सँक्रमणबाट मृत्यू भएको थियो ।