जनकपुरमा निषेधाज्ञाकोबीच पेठिया बजारको यस्तो अवस्था

न्यूज ब्यूरो, जनकपुरधाम । प्रदेश २ को अस्थायी राजधानी जनकपुरधामस्थित लाग्ने पेठिया बजारमा बिहानैबिहान सयौंको सँख्यामा नागरिकहरुको भीड देखिएको छ ।

कोरोना महामारी प्रदेश २ मै अहिले धनुषा जिल्ला र जनकपुर क्षेत्र रेडजोनमा भएपनि प्रशासनले लगाएको निषेधाज्ञाको कुनै माने मतलब नराखेर सयौंको सँख्यामा भीड लगाएर बजार लगाएको हो ।

जनकपुरधाम उपमहानगरपालिका वडा नम्बर ४ स्थित लाग्दै आएको पेठिया बजारमा बिहानदेखि ९ बजेसम्म सयौंको सँख्यामा भीड लाग्दै आएको छ । कोरोनाको चेन ब्रेक गर्नको लागि प्रशासनले निषेधाज्ञा लगाएपनि बिहानै भने निगरानी गर्न असफल भएको छ ।

बजारमा न भौतिक दुरी न मास्क नै प्रयोग गरी अज्ञात झैं सयौंको सँख्यामा भीड लगाउने गरिन्छ । व्यापारीहरु मात्र नभएर किनमेल गर्ने उपभोक्ताहरु समेत सचेत नभएको कारण आज जनकपुरको अवस्था दयनीय बन्दै गएको छ ।

जनकपुरको अस्पतालहरु कोरोना सँक्रमितहरु छटपटिरहेको बेला पेठिया बजारमा देखिएको नागरिकको लापरवाहीले झनै समस्या जटिल बनाउने सँकेत देखिएको छ । सयौंका सँख्यामा लाग्ने भीडबाट एकैजनाबाट सयौंमा एकैपटक कोरोना सर्ने डर रहेको छ ।

यस्तो अवस्थामा जनकपुरको हरेक वडामा ठेलामा साग सब्जी राखेर भीड नै नहुने गरी टोल टोलमा साग सब्जी पुरयाउनुपर्ने अवस्थामा पेठिया बजारमा देखिएको बेतिथीले कोरोनाको सँक्रमण सर्ने खतरा उत्तिकै बढेको देखिएको छ ।

स्थानीय प्रशासनले पेठिया तथा अन्य बजारहरु भीड नहुने ठाउँमा लगाउने र भीड नगर्ने गरी बजार लगाउन भनेपनि त्यसको अवज्ञा गर्दै पेठियामा सयौंको सँख्यामा उपभोक्ता र व्यापारीहरुले भीड लगाउने गरेको छ ।