धनुषामा दुई पक्षबीच झडप, दुवै तर्फबाट ६–६ जना घाईते, एकको अवस्था नाजुक !

न्यूज ब्यूरो, जनकपुरधाम । प्रदेश नम्बर २ को धनुषा जिल्लास्थित दुईपक्षबीच झडप हुँदा १२ जना घाईते भएका छन् ।

विहिबार दिउँसो धनुषाको सबैला नगरपालिका वडा नम्बर ४ पटेर्वा टोलस्थित बाटो विस्तारको क्रममा दुई पक्षबीच झडप हुँदा दुवै तर्फबाट ६–६ जना घाईते भएको जिल्ला प्रहरी कार्यालय धनुषाले जनाएको छ ।

उपभोक्ता समिति मार्फत पिसिसि ढलान गर्ने क्रममा उपभोक्ता समिति र स्थानीयबीच झडप भएको जिल्ला प्रहरी कार्यालय धनुषाका प्रहरी प्रवक्ता मकेन्द्र मिश्रले जनाएका छन् । उनका अनुसार, दुवै तर्फबाट ६-६ जना घाईते भएका छन् ।

घाईते १२ जनामध्ये एक जनाको अवस्था गम्भिर रहेको र उनको बोल्न सक्ने अवस्था समेत नरहेको औल्याउँदै सबै जनाको उपचार जनकपुरको प्रादेशिक अस्पतालमा भइरहेको छ । सो घटनामा एक जनालाई पक्राउ समेत गरिएको जनाइएको छ ।

सुरुमा बाटो विस्तारको क्रममा समान्य भनाभन भएपछि केही बेरमै विवाद उग्र भएको प्रहरीले जनाएको छ । पिसिसि ढलान गर्ने उपभोक्ता समितिको पदाधिकारी र स्थानीयबीच झडप चलेको थियो ।

सो घटनामा घाईते भएकाहरुको नाम भने अझै खुल्न नसकेको इलाका प्रहरी कार्यालय सबैलालाई उदृत गर्दै जिल्ला प्रहरी कार्यालय धनुषाले जनाएको छ ।