‘पाँच पाण्डव’ मा हिन्दु धर्म र आस्थामाथि मजाक बनाएको भन्दै विश्व हिन्दू परिषद्को आपत्ति, बहिष्कारको चेतावनी

न्यूज ब्यूरो, जनकपुरधाम । नेपाली चलचित्र ‘पाँच पाण्डव’ मा महाभारतका पूजनीय पात्रहरूको चित्रण गरिएको शैलीप्रति विश्व हिन्दू परिषद् नेपालले गम्भीर आपत्ति जनाएको छ । चलचित्रका सार्वजनिक भएका दृश्य तथा गीतले हिन्दू समुदायको धार्मिक आस्थामा चोट पुर्‍याएको परिषद्को आरोप छ ।

परिषद्ले एक विज्ञप्ति जारी गर्दै महाभारतलाई सामान्य मनोरञ्जनको विषय नभई सनातन हिन्दू सभ्यताको धार्मिक, सांस्कृतिक तथा आध्यात्मिक धरोहरका रूपमा व्याख्या गरेको छ ।

भगवान् श्रीकृष्ण, धर्मराज युधिष्ठिर, अर्जुन, भीम, नकुल, सहदेव र माता द्रौपदीजस्ता पात्र करोडौँ हिन्दूको आस्था र श्रद्धासँग जोडिएको उल्लेख गर्दै परिषद्ले उनीहरूको गरिमा र धार्मिक मर्यादामा आँच पुग्ने गरी चित्रण गर्न नहुने जनाएको छ ।

चलचित्र निर्माण गर्ने स्वतन्त्रता भए पनि त्यसका नाममा धार्मिक आस्था र सांस्कृतिक पहिचानमाथि प्रहार गर्ने छुट कसैलाई नरहेको परिषद्को भनाइ छ । अन्य धर्मका आस्थाका प्रतीकप्रति सम्मान अपेक्षा गर्नेहरूले हिन्दू धर्मका श्रद्धेय पात्रप्रति पनि समान सम्मान देखाउनुपर्ने उसले जनाएको छ ।

परिषद्ले चलचित्रका निर्माता, निर्देशक, कलाकार तथा निर्माण पक्षलाई विवादित दृश्य, संवाद र प्रस्तुतिहरू तत्काल पुनरावलोकन गरी आवश्यक सुधार गर्न आग्रह गरेको छ । साथै, निर्माण पक्षले हिन्दू समुदायको धार्मिक भावनामा चोट पुगेको विषयमा सार्वजनिक रूपमा आफ्नो धारणा स्पष्ट पार्नुपर्ने माग गरेको छ ।

माग सम्बोधन नभई चलचित्र प्रदर्शन गरिए शान्तिपूर्ण जनविरोध तथा चलचित्र बहिष्कार अभियान सञ्चालन गर्ने परिषद्ले चेतावनी दिएको छ । धार्मिक आस्थाको अपमान गरेर व्यावसायिक सफलता हासिल गर्ने प्रयास स्वीकार्य नहुने भन्दै उसले हिन्दू समाजलाई बहिष्कार अभियानमा सहभागी हुन आह्वान गर्ने जनाएको छ ।

परिषद्ले धार्मिक सद्भाव, सामाजिक सहिष्णुता र अभिव्यक्ति स्वतन्त्रताको सम्मान गर्ने उल्लेख गर्दै आफ्नो धर्म, संस्कृति र आस्थाको रक्षा गर्नु अधिकार तथा दायित्व दुवै भएको जनाएको छ ।