विजया दशमीदेखि बेपत्ता जनकपुरका ७ वर्षीय बालक साकेत झा धानखेतमा मृत भेटिए

न्यूज ब्युरो, जनकपुरधाम । धनुषाको नगराइन नगरपालिका वडा नं. ७ देवडिहाका १० दिनदेखि बेपत्ता ७ वर्षीय बालक मृत फेला परेका छन् ।

स्थानीय अजय झाका छोरा साकेत झाको शव घरदेखि करिब अढाई किलोमिटर उत्तरतर्फ रहेको धानखेतमा फेला परेको हो ।

धनुषाका प्रहरी प्रवक्ता डीएसपी ओमप्रकाश खनालका अनुसार केहीबेरअघि धानखेतमा बालकको शव फेला परेको हो । घटनास्थल पुगेर प्रहरीले अनुसन्धान सुरु गरेको उनले जानकारी दिए ।

गत कात्तिक ४ गते दशैंको टीकाका दिन घरबाट निस्किएका साकेत त्यसपछि बेपत्ता भएका थिए । बालक बेपत्ता भएपछि परिवारजन र प्रहरीले निरन्तर खोजी गर्दै आएका थिए ।

प्रहरीले नजिकका गाउँ, पोखरी, झाडी तथा सम्भावित स्थानमा खोजी गरे पनि बालकको अवस्था पत्ता लगाउन सकेको थिएन ।

बालकको शव फेला परेपछि घटनाले नयाँ मोड लिएको छ । बालकको हत्या भएको हुन सक्ने आशंका प्रहरीले गरेको छ । घटनाको प्रकृति र कारणबारे थप अनुसन्धान भइरहेको प्रहरीले जनाएको छ ।