धनुषाको हँसपुर बेल्हीमा प्रथम वडा अध्यक्ष कप खुला पुरुष भलिबल प्रतियोगिता सुरु

न्यूज ब्यूरो, जनकपुरधाम । धनुषाको हंसपुर नगरपालिका–५ बेल्हीमा प्रथम वडा अध्यक्ष कप खुला पुरुष भलिबल प्रतियोगिता सुरु भएको छ ।

जय माँ लक्ष्मी पूजा मेला समिति हंसपुर नगरपालिका–५ बेल्हीको आयोजनामा सञ्चालन हुन लागेको प्रतियोगिताको उद्घाटन समारोह भव्य रूपमा सम्पन्न भएको हो ।

मेला समितिका अध्यक्ष विजय यादवको अध्यक्षतामा आयोजित उद्घाटन समारोहमा हंसपुर नगरपालिकाकी कार्यवाहक नगर प्रमुख दुर्गी देवी मण्डल प्रमुख अतिथिका रूपमा सहभागी भएकी थिइन् ।

कार्यक्रममा निवर्तमान नगर प्रमुख रामज्ञान मण्डल, वडा नम्बर ५ का अध्यक्ष रामबली मण्डल, वडा नम्बर ३ का अध्यक्ष उदय सिंह, वडा नम्बर ४ का अध्यक्ष लालबाबु यादव तथा जिल्ला भलिबल संघका अध्यक्ष भुवनेश्वर यादव, उपाध्यक्ष बेचन साह र सचिव प्रविण झाको उपस्थिति रहेको थियो ।

उद्घाटन समारोहमा वक्ताहरूले खेलकुदले युवामा अनुशासन, आपसी सद्भाव, एकता र प्रतिस्पर्धात्मक भावनाको विकास गर्ने उल्लेख गर्दै स्थानीयस्तरमा खेलकुद गतिविधिलाई प्रोत्साहन गर्नुपर्नेमा जोड दिएका थिए ।

स्थानीय क्षेत्रमा भलिबल खेलको विकास, प्रतिभावान खेलाडीको पहिचान र युवालाई खेलकुदप्रति आकर्षित गर्ने उद्देश्यले प्रतियोगिता आयोजना गरिएको आयोजकले जनाएको छ ।

प्रतियोगितामा विभिन्न क्षेत्रका खेलाडीहरूको सहभागिता रहने जनाइएको छ । उद्घाटन समारोहमा सहभागी अतिथिहरूले खेलाडीलाई खेल भावना र अनुशासन कायम राख्दै उत्कृष्ट प्रदर्शन गर्न शुभकामना दिएका थिए ।

बेल्हीमा पहिलो पटक आयोजना गरिएको वडा अध्यक्ष कपले स्थानीय खेलकुद गतिविधिलाई थप प्रोत्साहन गर्नुका साथै युवाहरूको प्रतिभा उजागर गर्ने अपेक्षा गरिएको छ ।