उनीहरुको स्वार्थपूर्ति नभएपछि केही पार्टीका कार्यकर्ता पत्रकारले मेरो बारेमा भ्रम फैलाएः अधिकृत ठाकुर

न्यूज ब्यूरो, जनकपुरधाम । मालपोत कार्यालय सिरहाका प्रमुख सुबोध कुमार ठाकुरले केही दलका कथित पत्रकारहरुको स्वार्थपूर्ति नभएपछि आफ्नो बारेमा गलत तथ्य तथा भ्रम फैलाएको बताएका छन् ।

विहिबार सिरहाका केही राजनीति पार्टीसँग आवद्ध पत्रकारहरुको मिडिया फेसबुक पेजमा भूमि प्रशासन सिरहाका प्रमुख ठाकुरलाई कार्यकक्षमै थुनिएको समाचार लेखेपछि ठाकुरले त्यस्तो केही नभएको प्रष्टयाएका छन् ।

समाजिक सँजालमा एक भिडियो पोष्ट गर्दै अधिकृत ठाकुरले केही कथित पत्रकारले भूमि प्रशासन कार्यालयमा गैर कानुनी कार्यको लागि फोर्स गर्दा अस्विकार गरेपछि मिथ्या भ्रम फैलाएको बताए । उनले आफूलाई कसैले पनि कार्यालयमा नथुनेको सुनाए ।

उनले भने,“मलाई कार्यालयमा थुनेको भए, जिल्ला प्रहरी कार्यालय, जिल्ला प्रशासन कार्यालय, अदालत सबै त उही छ । कतैबाट पता लगाए भैगो नी ? उनीहरुको आफ्नो स्वार्थ पूरा नभएपनि बदनाम गर्न खोजेको मात्रै हो ।”

सिरहाबाट सँचालनमा रहेको केही मिडियाको फेसबुक पेजमा अधिकृ ठाकुरको बारेमा थुनिएको समाचार प्रकाशित गरेको थियो । यद्यपी, त्यो तथ्य गलत र अफवाह मात्र भएको उनले खण्डन गरेका छन् ।