अर्नब चक्रवातको प्रभाव हट्दै, आजदेखि देशभर मौसममा सुधार

न्यूज ब्युरो, जनकपुरधाम । ‘अर्नब’ चक्रवातको प्रभावका कारण बिहीवारदेखि देशका विभिन्न स्थानमा भइरहेको लगातार वर्षा रोकिएको छ । हिजो बेलुकीदेखि वर्षा क्रमशः कम हुँदै गएपछि आजदेखि देशभरको मौसममा सुधार आउने मौसम पूर्वानुमान महाशाखाले जनाएको छ ।

महाशाखाका अनुसार गएराति काठमाडौं उपत्यका आसपासका एक–दुई स्थानमा छिटपुट वर्षा भए पनि देशका अधिकांश स्थानबाट चक्रवातको प्रभाव हटिसकेको छ ।

यद्यपि, गण्डकी, कर्णाली र सुदूरपश्चिम प्रदेशका हिमाली तथा पहाडी भूभागका एक–दुई स्थानमा हल्का वर्षा र हिमपातको सम्भावना छ ।

त्यस्तै, तराईका क्षेत्र, उपत्यका तथा खोँचहरूमा बिहानको समयमा केही स्थानमा हुस्सु र कुहिरो लाग्न सक्ने अनुमान गरिएको छ ।

वर्षा रोकिएर मौसममा सुधार आए पनि काठमाडौं उपत्यकासहित देशका विभिन्न भागमा चिसो बढेको छ ।