मेयरलाई उपहारस्वरूप 'फोहोर गिफ्ट' प्याक गरी दिन पुगे अभियन्ता, भेट्न नपाएपछि फर्किए

न्यूज ब्यूरो, जनकपुरधाम । जनकपुरधामको फोहोर व्यवस्थापन समस्याप्रति ध्यानाकर्षण गराउन एक अभियन्ताले संकलित फोहोरलाई उपहारका रूपमा प्याक गरेर मेयरलाई दिन खोजेका छन् ।

स्थानीय अभियन्ता सञ्जय मण्डलले सहरका विभिन्न स्थानबाट संकलन गरेको फोहोरलाई प्रतीकात्मक उपहार बनाएर नगर प्रमुखलाई बुझाउन खोजेका हुन् । तर, सम्बन्धित जनप्रतिनिधि तथा अधिकारीसँग भेट हुन नसकेपछि उनी त्यसै फर्किएका छन् ।

मण्डलले यसअघि पनि जनकपुरधामका सार्वजनिक स्थल तथा धार्मिक क्षेत्रहरूमा थुप्रिएको फोहोरबारे सार्वजनिक रूपमा आवाज उठाउँदै आएका छन् ।

सहरको सरसफाइ अवस्था कमजोर रहेको भन्दै स्थानीय बासिन्दाले समेत पटक–पटक विरोध प्रदर्शन गर्दै आएका छन् । धार्मिक तथा पर्यटकीय महत्त्व बोकेको जनकपुरधाममा फोहोर व्यवस्थापन प्रभावकारी हुन नसक्दा नगरपालिकाको कार्यशैलीमाथि प्रश्न उठ्दै आएको छ ।

अभियन्ताले फोहोरलाई उपहारका रूपमा प्रस्तुत गरेको घटनाले नगरको सरसफाइ समस्याप्रति जनप्रतिनिधिको जवाफदेहिताको विषयलाई पुनः चर्चामा ल्याएको छ ।