रास्वपा सांसद रहबर अन्सारी सहभागी चियापानमा घण्टीका कार्यकर्ताबीच टनाटन, सडकमै थुराथुर

न्यूज ब्यूरो, बारा । बाराको जितपुरसिमरा उपमहानगरपालिका–२३ भलुहीमा राष्ट्रिय स्वतन्त्र पार्टी (रास्वपा) ले आयोजना गरेको चियापान तथा छठ पर्वको शुभकामना आदानप्रदान कार्यक्रममा पार्टीकै दुई पक्षबीच कुटाकुट भएको छ ।

रास्वपाका प्रतिनिधिसभा सदस्य रहबर अन्सारीको प्रमुख आतिथ्यमा आयोजित कार्यक्रममा विवाद चर्किएपछि झडप भएको हो । झडपमा दुवै पक्षका १० जनाभन्दा बढी कार्यकर्ता घाइते भएका छन् ।

बिहीबार छठ पर्वको अवसरमा आयोजित कार्यक्रममा स्थानीय कार्यकर्ता असलम देवान र सुवास मन्सुरी पक्षबीच विवाद सुरु भएको प्रहरीले जनाएको छ । कार्यक्रममा बोल्ने क्रममा सुरु भएको भनाभन व्यक्तिगत रिसइबी र आरोप–प्रत्यारोप हुँदै कुटाकुटमा परिणत भएको इलाका प्रहरी कार्यालय सिमराका प्रहरी नायब उपरीक्षक दयाकृष्ण भट्टले बताएका छन् ।

प्रहरीका अनुसार चियापान कार्यक्रम सकिएपछि सांसद अन्सारी कार्यक्रमस्थलबाट बाहिरिसकेका थिए । त्यसपछि दुई पक्षबीच झडप हुँदा स्थिति तनावपूर्ण बनेको थियो । झडप नियन्त्रण गर्ने क्रममा एक प्रहरीसमेत सामान्य घाइते भएका छन् ।

घाइतेहरूलाई वीरगञ्ज–१४ गण्डकस्थित हेल्थकेयर अस्पताललगायत विभिन्न अस्पतालमा उपचारका लागि लगिएको छ । तर अस्पतालमा उपचार भइरहेकै बेला दुवै पक्षका कार्यकर्ताबीच पुनः विवाद र झडप भएको थियो ।

अस्पताल परिसरमै तनाव बढेपछि प्रहरीले थप हस्तक्षेप गरेको थियो । इलाका प्रहरी कार्यालय सिमराले पाँच जना र वीरगञ्जस्थित इलाका प्रहरी कार्यालय श्रीपुरले नौ जनालाई नियन्त्रणमा लिएको तथा प्रहरीले घटनामा संलग्नहरूमाथि अनुसन्धान गरिरहेको जनाएको छ ।

आफ्नै पार्टीले आयोजना गरेको चियापान तथा शुभकामना आदानप्रदान कार्यक्रम दुई पक्षबीचको झडपमा परिणत भएपछि रास्वपाको स्थानीय संगठनभित्रको विवादसमेत चर्चामा आएको छ ।