धनुषाका प्रशासनीक उच्च पदस्थ अधिकारीहरुद्धारा कमला नदी तटबन्ध नीरिक्षण

न्यूज ब्यूरो, जनकपुरधाम । शनिबार धनुषाका प्रशासनीक निकायहरुद्धारा कमला नदीको तटबन्ध नीरिक्षण गरिएको छ ।

कमला बचाउ अभियानका अगुवा विक्रम यादवको विशेष पहलमा धनुषाका सिडिओ, एसपी, सशस्त्र प्रहरीका एसपी सहित नेपाली सेनाको टोलीले कमला नदीको धनुषा सीमाको तटबन्ध नीरिक्षण गरेका हुन् ।

कमला बचाउ अभियान अन्तर्गत थालिएको विभिन्न प्रयासहरुमध्ये शनिबार धनुषाका प्रशासनीय निकायहरुलाई अभियानका सँयोजक विक्रम यादवले नीरिक्षण गराएका हुन् ।

बाढीको समयमा कमला नदीले मच्चाउने त्रास, कमला नदीको पश्चिमी तटबन्धको अवस्थाबारेमा जानकारी लिएका हुन् । सो क्रममा धनुषाको इनर्बादेखि चिसापानीसम्म नीरिक्षण गरेका हुन् ।

धनुषाका सिडिओ बन्धु प्रसाद वास्तोला, नेपाल प्रहरीका एसपी प्रकाश रानाभाट, सशस्त्र प्रहरीका एसपी नरेन्द्र सेन, नेपाली सेनाका आर्मी चिफ गजेन्द्र रावल लगायतका सुरक्षाका उच्च पदस्थ अधिकारीहरुले नीरिक्षण गरेका हुन् ।

धनुषाको जनकनन्दिनी गाउँपालिका सहित नेपाल–भारत बोर्डरसम्मको कमला नदी तटबन्ध हुँदै धनुषाको चिसापानीसम्म अधिकारीहरुले शनिबार दिनभरि नीरिक्षण गरेका हुन् ।

कमला नदीबाट अवैद्य रुपमा उत्खनन गरिने अबैद्य गिट्टी, बालुवा, माटो उत्खननको अवस्थाबारे समेत अधिकारीहरुले जानकारी लिएका थिए । स्थानीयहरुसँग समेत विभिन्न ठाउँमा भेट गर्दै अधिकारीहरुले कमलाको अवस्थाबारे मुवायना गरेका थिए ।

नीरिक्षणको क्रममा कमला नदी नियन्त्रण आयोजनाका प्रमुख एकराज भट्टराई लगायतको प्राबिधिक टीमले नदी तटबन्ध बारे विभिन्न ठाउँको अवलोकनको क्रममा वृहत ब्रिफिँग गरेको थियो ।

सो क्रममा धनुषा र सिरहा जोडने बहुप्रतिक्षित कमला नदीको पूलको समेत नीरिक्षण गरेका थिए भने धनुषातर्फको इनर्बा बाँध, चुम्काचौक बाँध, चक्ला बाँध हथमुण्डा, पोर्ताहा, रामघाट सहितको स्थानमा नीरिक्षण गरी कमला नदीले कटान गर्न सक्ने सम्भाव्यता र उपायको बारेमा नीरिक्षण गरिएको थियो ।

सिडिई एकराज भट्टराईले अधिकारीहरुलाई कमला नदीको वर्तमान अवस्था र बाढीको समयमा मच्चाउने कहरको सम्बन्धमा जानकारी गराएका थिए । विभिन्न ठाउँमा नदीको उच्च बहाबले तटबन्धमा पारेको प्रभाव र आम नागरिकलाई बचाउने दृष्टिकोणले नीरिक्षण गरिएको हो ।

नीरिक्षणको क्रममा अधिकारीहरुले कमला तटबन्धको लागि माथिल्लो निकायसम्म सिफारिस गरी समस्याको समाधान गर्ने प्रतिबद्धता जनाए ।

अहिले कमला नदीमा भारी मात्रामा बालुवा, गेगर, गिटी आउन सुरु भएको भन्दै निकट भविष्यमै कमलाबाट हुने सिँचाईमा अधिक प्रभावलाई मध्यनजर गर्दै सिडिओ वास्तोलाको नेतृत्वमा अधिकारीहरुले नीरिक्षण गरेका हुन् ।

कमला नगपालिकाका मेयर राम उदगार गोईत, कार्यकारी प्रमुख प्रशासकीय अधिकृत वीरेन्द्र कुमार सढान सहित कमला बचाउ अभियानका अभियानी सुरेन्द्र यादव, राजकिशोर सल्हैता, राम कुमार महतो, पत्रकार, नेपाल रेडक्रस सोसाईटीका धनुषा सभापति नरेश सिँह, ईलाका प्रहरी कार्यालय खजुरीको टोलीको सहभागीता रहेको थियो ।