आजदेखि जनकपुरमा साहित्य महोत्सव हुँदै, राजेश हमालदेखि मनिषा कोइरालासम्म आउँदै

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधाममा आजदेखि साहित्य महोत्सव प्रारम्भ हुँदैछ ।

जनकपुर साहित्य महोत्सव नाम राखिएको सो साहित्य महोत्सवमा नेपालका महानायक राजेश हमालदेखि बलिवुड/कलिवुड अभिनेत्री मनिषा कोईरालासम्म आउने भएको छ ।

आज (बुधबार) देखि जानकी मन्दिरको प्राँगनमा सुरु हुने साहित्य महोत्सवलाई गणतन्त्र नेपालका प्रथम राष्ट्पति डा. राम वरण यादवले उदघाटन गर्ने कार्यक्रम रहेको आयोजक समितिले जनाएको छ ।

फोनपे र डिसहोमद्धारा प्रायोजित तथा नवमिथिला फाउण्डेशनको आयोजना फागुन १९ गतेदेखि २२ गतेसम्म ४ दिने जनकपुर साहित्य महोत्सवमा उद्योगपति विनोद चौधरी सहित दिग्गज राजनीतिकर्मीहरुको पनि सहभागीता रहनेछ ।

महोत्सवमा कार्यक्रममा प्रदेश २ का मुख्यमन्त्री लालबाबु राउत, उद्योगी व्यवसायी विनोद चौधरी, नेपाल पर्यटन बोर्डका कार्यकारी निर्देशक डा. धनन्जय रेग्मी, सिके लाल, राजनीतिकर्मी प्रदीप गिरि लगायतको सहभागिता रहने छ ।

मँगलबार पत्रकार सम्मेलनको आयोजना गरी आयोजक टिमले जनकपुर साहित्य महोत्सवको बारेमा जानकारी गराएको थियो । सो क्रममा पत्रकार, राजनीतिकर्मी, कलाकर्मी लगायतको प्रत्यक्ष भूमिका रहने जनाएको थियो ।

यसप्रकारको कार्यक्रमले अन्तराष्ट्रिय क्षेत्रमा जनकपुरधामको महत्व बढने जनकपुर साहित्य महोत्सवका मनिष झाले बताए । महोत्सवमा नेपालका राजनीति, साहित्य, व्यापार कला संस्कृतिका हस्तीहरु सहभागि हुनेछन ।

फागुन १९ गतेदेखि २२ गतेसम्म हुने महोत्सवमा जानकी दर्शन, जाऔ जनकपुर, प्रविधि र संस्कृति, साहित्यमा सीमाञ्चल, किताब वर्णदेखि बस्तुसम्म, कसले देला सुशासन, सिनेमाको रंग, सम्पादनको सकस, विदेशको यात्रा आशा कि लाश,अन्तवार्ताकारहरुको अन्तवार्ता, आ–आफनै कथा, समायिक राजनीतिमागन्थन, मैथिल मिठास, मुखियाको मर्म, वैदेहीहरु, मेरो नगरको कथा लगायतको विषयमा चर्चा गरिने आयोजक कमिटीका भूपेन्द्र खडकाले जनाएका छन ।

समारोहमा सांस्कृतिक कार्यक्रम, मैथिली भोजन र कवि गोष्ठी जस्ता कार्यक्रम पनि राखिएको छ । गतवर्षपनि जनकपुरधाममा जनकपुर साहित्य महोत्सव गरिएको थियो ।

महोत्सवको आयोजक कमिटीका निर्देशक दिलभूषण पाठकले जनकपुरधाम फोहर मात्रै होइन यहाँ धेरै राम्रा कुरोपनि रहेका छन त्यो सन्देश पनि लग्नु यस्ता कार्यक्रमको उद्देश्य रहेको बताए ।

पत्रकार सम्मेलनको क्रममा सँचारकर्मी घनश्याम मिश्रा, पत्रकार महासँघका अध्यक्ष अनिल मिश्र, जनकपुरधाम उपमहानगरपालिका वडा नम्बर ७ का वडाध्यक्ष जानकीराम साह सहित टिमले महोत्सवको बारेमा जानकारी गराएको थियो ।