आज सरस्वति पूजा, यो विधिले पूजा गरे पढाईमा मन लाग्ने जनविश्वास

न्यूज ब्यूरो, जनकपुरधाम । माघ शुक्ल पञ्चमीका दिन मनाइने ‘श्रीपञ्चमी’ पर्व आज विद्याकी अधिष्ठात्री देवी सरस्वतीको निष्ठापूर्वक पूजा–आराधना गरी मनाइँदैछ ।

हरेक वर्ष माघ शुक्लपञ्चमीका दिन मनाइने श्रीपञ्चमी तथा सरस्वती पुजाको दिन हरेक सरस्वती मन्दिरमा पुजा गर्नेको भीड लाग्ने गर्छ । विद्याकि देवी सरस्वतीको पुजा विशेष गरि विद्यार्थी तथा बालबालिका तथा शिक्षाका क्षेत्रमा काम गर्नेहरूले गर्दछन् । स्कुल, कलेज तथा विश्वविद्यालय र इन्ष्टिच्युटहरूमा देवी सरस्वतीको धुमधामका साथ पूजा हुन्छ ।

विद्यालय नपठाइएका साना बालबालिकालाई आजकै दिनदेखि अक्षरारम्भ गराउने चलन छ । आजका दिन लेखपढ गर्न सिकाए राम्रो विद्या आउने धार्मिक विश्वास छ ।

यस दिन बालबालिकालाई शिक्षारम्भका सँगै नाक–कान छेडिदिने परम्परा पनि गरिन्छ । नाक, कान छेडिदिने परम्परा पहाडी जिल्ला सहित काठमान्डौं उपत्यकामा देखिन्छ भने तराई मधेशतिर यस्तो परम्परा भने रहेको छैन् ।

प्रदेश २ को अस्थायी राजधानी जनकपुरधाम स्थित विभिन्न स्कूल तथा कलेजहरु सहित चोक चौराहामा सरस्वतिको प्रतीमा राखेर धुमधामका साथ पूजाआजा गरिरहेको छ । सरस्वतीलाई चढाइएको सात गेडा अक्षता दाँतले नछोई निलेमा विद्या र बुद्धि स्फुरण भई विद्यादेवीबाट चेतनाको ज्योति पाइन्छ भन्ने धार्मिक विश्वास छ ।

सरस्वतिको आराधाना यी मन्त्रहरुको जाप गरी गरिन्छ :

या कुन्देन्दुतुषारहारधवला या शुभ्रवस्त्रावृता

या वीणावरदण्डमण्डितकरा या श्वेतपद्मासना।

या ब्रह्माच्युत शंकरप्रभृतिभिर्देवैः सदा वन्दिता

सा मां पातु सरस्वती भगवती निःशेषजाड्यापहा ।

शुक्लां ब्रह्मविचारसारपरमाद्यां जगद्व्यापिनीं

वीणापुस्तकधारिणीमभयदां जाड्यांधकारपहाम्।

हस्ते स्फाटिकमालिकां विदधतीं पद्मासने संस्थितां

वन्दे तां परमेश्वरीं भगवतीं बुद्धिप्रदां शारदाम्।।

वसन्त पञ्चमीको दिन विधिविधानका साथ देवी सरस्वतीको पूजा गर्दा विद्या र बुद्धिका साथसाथै सफलता पनि पाइने विश्वास गरिन्छ ।

विहानै उठेर स्नान गरेपछि पवित्र आचरण र बोलीको संकल्प लिँदै माता सरस्वतीको पूजा गर्नुपर्छ । पूजामा चन्दन, अक्षता, सेतो र पहेंलो फूल, सेतो चन्दन र सेतो वस्त्र देवीलाई चढाउँनुपर्छ ।

प्रसादमा पहेँलो चामल, खीर, दूध, दही, मक्खन, सेतो तिलको लड्डु, घिउ, नरिवल, सक्खर र मौसम अनुसारको फल चढाउँनुपर्छ ।

त्यसपछि माता सरस्वतीसँग बुद्धि र सफलताको कामना गरेर दीप प्रज्वलन गर्दै आरती गर्नुपर्छ । पढाइमा मन नलाग्ने विद्यार्थीहरूले देवी सरस्वतीको नित्य पूजन गरेमा पढाईमा मन लाग्छ । देवीको प्रतिमाअगाडि उभिएर मन्त्रहरु उच्चारण गर्दा स्मरण शक्ति बढ्छ ।