जनकपुरमा आज ओलीको पुतला जलाइने, प्रहरीलाई समेत प्रतिकार गर्ने चेतावनी

न्यूज ब्यूरो, जनकपुरधाम । प्रदेश नम्बर २ को अस्थायी राजधानी जनकपुरधाममा आज जनता समाजवादी पार्टीले प्रधानमन्त्री केपी शर्मा ओलीको पुतला जलाउने भएको छ ।

जसपाको पूर्वघोषित कार्यक्रम अनुसार आईतबार दिउँसो १ बजे जनकपुरको जनकचोकमा प्रम ओलीको पुतला दहन गर्ने कार्यक्रम तय गरेको हो । संविधान मिचेर सँसद विघटन गरेको विरोधमा जसपाले प्रम ओलीको पुतला जलाउने भएको हो ।

न्यूज ब्यूरोसँग कुराकानी गर्दै जसपाका युवा नेता किसन साहले आजको कार्यक्रममा प्रहरीले हस्तक्षेप गरे प्रहरीको पनि प्रतिकार गर्ने तयारी गरिएको जनाए । उनले जनकपुरको जनकचोकमा दिउँसो गरिने पुतला दहनको कार्यक्रममा गाउँ स्तरबाट पनि जसपाका कार्यकर्ताहरु भेला हुने जनाए ।

उनले धनुषा जिल्लाको सबै स्थानीय तहमा आज ओली विरुद्ध पुतला दहन गर्ने कार्यक्रम राखिएको जानकारी दिए । त्यसको लागि अहिलेदेखि नै तयारी सुरु गरिएको बताएका छन् ।

माघ २२ गते जनकपुरमा नेकपाले गरेको बन्दको क्रममा धनुषा प्रहरी र प्रदर्शनकारीबीच झडप हुँदा प्रहरी सहित प्रदर्शनकारी पनि घाईते भएका थिए ।