नेकपाको हडताल : सर्वसाधारणलाई मात्रै होइन, पत्रकारलाई पनि दुर्व्यवहार

न्यूज ब्यूरो, सिरहा । नेकपा प्रचण्ड-नेपाल समूहले आज गरेको आमहडतालको प्रभाव देशैभरी परेको छ ।

प्रचण्ड-नेपाल समूहले हिजो आमहडताल घोषणा गर्दा अत्यावश्यक बाहेकका सेवा सञ्चालन हुन नदिने भनेपनि आन्दोलन शान्तिपूर्ण रहने बताएको थियो । गृह मन्त्रालयले भने कुनै पनि सेवा बन्द हुन नदिने र शान्तिपूर्ण आन्दोलनमा हस्तक्षेप नगर्ने भन्दै बुधबार साँझ विज्ञप्ति जारी गर्‍यो ।

तर, आन्दोलन घोषणा गर्ने समूहले भने जस्तो अत्यावश्यक बाहेकका सबै थोक बन्द भएपनि आन्दोलन शान्तिपूर्ण भने छैन । नत गृह मन्त्रालयले भने जस्तो सबै सेवा सञ्चालन हुन सकेको छ ।

आन्दोलनकारीहरुको अराजकता र प्रशासनको निरीहताले अत्यावश्यक काममा हिडेका सर्वसाधारणले पनि दु:ख भोगिरहेका छन् । बन्दको उल्लंघन गरेको भन्दै उनीहरूले सर्वसाधारणको सवारीसाधन तोडफोड गर्नेदेखि हातपात गर्नेसम्मका कार्य गरिरहेका छन् ।

मिर्चैयामा मात्रै आन्दोलनकारीहरुको भाटाले झण्डै एक यात्रीको टाउको फुटेन । एक सर्वसाधारण मोटरसाइकलमा कतै जाँदै थिए । त्यतिकैमा आन्दोलनकारीहरु उनको मोटरसाइकल रोक्छन् ।

त्यहाँ उपस्थित सबैका हातमा भाटा छ । र, ती भाटाबालाहरु उनका कुरा पनि नसुन्दै मोटरसाइकल र उनीमाथि भाटा बर्साउन थाल्छ ।

त्यतिमात्रै होइन, त्यो उछृङखलताको भिडियो लिइराखेका एकजना स्थानीय पत्रकारमाथि समेत उनीहरूले दुर्व्यवहार गरे । केहि छिनपछि रिपोर्टिङमा रहेका एक अर्का पत्रकारको पनि मोटरसाइकलको साँचो खोसियो ।

यो उदाहरण मात्रै हो । यहाँ बिहानैदेखि यो क्रम चलिरहेको छ । यहाँ पार्टीका ठूलै नेताहरूको प्रत्यक्ष सहभागिता रहेपनि आन्दोलन व्यवस्थित देखिएको छैन । अन्य अधिकांश ठाउँको अवस्था पनि यस्तै छ ।

जनतालाई दु:ख दिइने आन्दोलन जनताहितको हुन नसक्ने पत्रकार तथा बुद्धिजीवी देवकुमार यादव बताउँछन् । 'राजनीतिक आन्दोलन जनतालाई दु:ख दिन होइन,' उनलेे भने, 'शासकलाई सबक सिकाउन हुनुपर्छ ।'