जसपाका जानी खान ओली शरणमा, जसपाले यूज मात्र गरेको आरोप

न्यूज ब्यूरो, जनकपुरधाम । जनता समाजवादी पार्टीका युवा नेता जानी खान प्रधानमन्त्री केपी शर्मा ओलीको पार्टीमा गएका छन् ।

तत्कालिन राष्ट्रिय जनता पार्टी (राजपा) का जिल्ला उपाध्यक्ष समेत रहेका जानी खानले शनिबार विधिवत रुपमा आफू केपी ओलीको पार्टीमा गएको घोषणा गरेका छन् । जसपाले आफूहरुलाई यूज मात्र गरेको भन्दै ओलीसँग गएको बताएका छन् ।

न्यूज ब्यूरोसँगको संक्षिप्त कुराकानीमा खानले जसपाका नेताहरुले यत्रो दिन देखि प्रयोग गरी आफ्नो स्वार्थको रोटी मात्र सेकेको अरोप लगाउँदै प्रधानमन्त्रीको ओलीको मिशन देखेर नेकपामा प्रवेश गरेको बताए ।

उनले समाजिक सँजाल फेसबुकमा प्रधानमन्त्रीसँगको फोटो राख्दै आजदेखि विधिवत रुपमा जसपा पार्टी परित्याग गरी नेकपाको ओलीसँग गएको बताएका छन् । सोहीसँगै जनकपुरका सरोज मिश्रको तस्विर रहेपनि उनले आफू स्वतन्त्र रहेको प्रतिक्रिया दिएका छन् ।

युवा अगुवा सरोज मिश्रले जानी खान आफनो ईच्छाले केपी ओलीको पार्टीमा गएको बताउँदै आफू नगएको दाबी गरे । “अस्ति भेटघाट मात्र गर्न गएको थिए, त्यसै क्रममा प्रम ज्यूले स्वागत र सम्मान गर्नुभयो, पार्टीमा प्रवेश गरेको छैन् ।”– उनले भने ।

यसअघि सोही फोटोलाई समाजिक सँजालमा ट्रोल गर्दै जानी खान र सरोज मिश्र नेकपामा प्रवेश गरेको भन्दा उनीहरु दुवै जनाले अस्विकार गरेका थिए । ओलीको सुखी नेपाली समृद्ध नेपालको सपनामा सहभागी हुन आफू ओलीसँग गएको खानको भनाई छ ।

यसका साथै, उनले मधेशको मुद्दालाई पुनः जागृत गरी मधेशीको हक अधिकारको लागि नेकपामा गएको बताउँदै जसपाले मात्र मधेशको नाम भँजाएर खाएको औल्याए ।