सर्लाहीः बिओपीद्वारा ३२ वटा अवैध कुखुरा गाडिए

न्यूज ब्यूरो, सर्लाही । सर्लाहीको सशस्त्र सिमा सुरक्षा बल सिमराले दुईवटा साईकलमा भारतबाट नेपाल तर्फ ल्याउदै गरेको ३२ वटा अवैध ब्रोईलर कुखुरा नियन्त्रणमा लिएर माटोभित्र पुरिदिएको छ ।

भारतीय सिमावर्ती क्षेत्र फेन्हराबाट नेपालको बिष्णु गाउँपालिकाको पकडी तर्फ ल्याउदै गरेको अन्दाजी ९६ किलोग्राम तौल भएको कुखुरा सिमा सुरक्षाबलले नियन्त्रणमा लिई नष्ट गरेको हो ।

भारत तर्फबाट बिष्णु गाउँपालिका वार्ड नं. ५ स्थित पकडी तर्फ दुईवटा साईकलमा राखेर ल्याउदै गरेको अवस्थामा सुरक्षामा खटिएको सुरक्षाकर्मीलाई देख्दा तस्कर साईकल छोडी फरार भएको सिमरा बिओपी पोस्टका सशस्त्र प्रहरी निरिक्षक विकास श्रेष्ठले जानकारी दिए ।

भारतको विभिन्न राज्यहरुमा बर्डप्लु को महामारीका कारण हजारौं चराहरु मर्न थालेपछि सिमा सुरक्षा बलले सिमामा कडाई गरेपछि अवैध चल्ला, कुखुरा र अण्डाहरु धमाधम पक्राउ हुन थालेका छन ।