प्रधानमन्त्री ओली संविधानको हत्यारा : नेता साह

न्यूज ब्यूरो, जनकपुरधाम । जनता समाजवादी पार्टी नेपालका केन्द्रीय सदस्य एवम् नेता सँजय कुमार साहले प्रधानमन्त्री नेपालको संविधान २०७२ को हत्यारा भएको बताएका छन् ।

उनले आईतबार सँसद विघटनको सिफारिस गरेर वर्तमान संविधानको हत्या गरेको बताउँदै उनको प्रगिगामी कदमले नेपालको राजनीतिलाई कालो दिनको रुपमा लिइने बताए ।

सँसद विघटनप्रतिको प्रक्रियामा उनले नेपालको संविधान २०७२ को भाग ७ को धारा ७६ को उपधारा ७ को ५ बमोजिम प्रधानमन्त्री विश्वासको मत प्राप्त नगरेको अवस्थामा प्रधानमन्त्रीले राष्ट्रपति समक्ष सँसद विघटनको प्रस्ताव पेश गर्ने प्रवधान भएपनि सिधै विघटन गर्नु संविधानको हत्या भएको बताए ।

उनले राष्ट्रपति जस्ता सम्मानीय र उच्च पदस्थले पनि कठपुतली झैं भएर पदीय दुरुपयोग गर्न कुनै कसर बाँकी नराखेको आरोप लगाए । उनले प्रधानमन्त्री ओली उपर कसैले विश्वासको प्रस्ताव नल्याएपनि एकाएक सँसद विघटन गरी नाँगो चरित्र प्रदर्शन गरेको बताए ।

जनता समाजवादी पार्टीले यसको विरोधमा सडक तताउने चेतावनी दिँदै लोकतन्त्रलाई खतरामा पारेकोले यसको विरुद्ध सबै लोकतान्त्रिक शक्ति एकजुटको विकल्प नरहेको बताए ।