भोलीदेखि जनकपुरमा माछा मासु र दारु बेच्न तथा खान पनि नपाउने

न्यूज ब्यूरो, जनकपुरधाम । जनकपुरमा भोली (शुक्रबार) देखि माछा, मासु र मदिरा (दारु) बेच्न तथा खान नपाउने गरी निषेध गरिएको छ ।

जिल्ला प्रशासन कार्यालय धनुषाले एक सूचना जारी गर्दै ऐतिहासिक विवाहपँचमी महोत्सवलाई मध्यनजर गर्दै जनकपुर क्षेत्रभित्र माछा, मासु वा मदिरा विक्री वितरणका साथै खान समेत निषेध गरिएको जनाइएको छ ।

पुस ४ गते शनिबार जनकपुर स्थित जानकी मन्दिर क्षेत्रमा ऐतिहासिक, धार्मिक र साँस्कृतिक महत्वको सीताराम विवाहपँचमी महोत्सव मनाइने भएकोले पुस ३ गते शुक्रबार बिहान ६ः०० बजदेखि नै निषेध गरिएको जनाइएको छ ।

माछा, मासु र मदिरामा पुस ३ गते बिहानदेखि आगामी पुस ५ गते राती १२ बजेसम्मको लागि ३ दिन निषेध गरिएको जनाइएको छ । सो अवधीमा जनकपुर क्षेत्रभित्र सो समाग्री विक्री वितरणमा रोक लगाइएको हो ।

जनकपुरधाम प्रवेश गर्ने मुख्यद्धार, सीमा एवम् जनकपुरधाम स्थित परिक्रममा मार्ग सोको आसपास भित्र पनि माछामासु तथा मदिरा विक्री वितरण, सेवन एवम् कारोवार गर्न वा गराउन नपाउने भनिएको छ ।

स्थानीय प्रशासन ऐन २०२८ को दफा ६ बमोजिम सूचना प्रकाशन गरिएको जनाउँदै आदेश पालना नभएमा प्रचलित कानुन बमोजिम कारवाही हुने पनि जनाइएको छ । आदेश पालनाको लागि स्थानीय बुद्धिजीवी, व्यापारी तथा सर्वसाधारणमा आग्रह गरिएको छ ।

यता, प्रत्येक वर्ष सिडिओ कार्यालयले यस्ता सूचना जारी गरेपनि ठुल ठुला होटलहरुमा मदिरासेवन देखि लिएर माछामासुको विक्री वितरण निर्वाध हुने गरेको छ । साना साना व्यापारीलाई प्रहरीले समातेपछि केही होटलसँग सेटिँग गरेर माछा, मासु र मदिरा विक्री वितरणमा सहयोग पुरयाउँदै आएको गुनासो पनि सुनिएको छ ।