नेपालको ताजमहल भनिने 'जानकी मन्दिर' भित्रै कहिले यो ठाउँ घुम्नुभएको छ ?

न्यूज ब्यूरो, जनकपुरधाम । विश्वप्रसिद्ध एवम् नेपालको ताजमहल भनेर भनिने जानकी मन्दिर प्रायः धेरैले घुमेको हुनुपर्छ । जनकपुरको बीचमै रहेको ऐतिहासिक जानकी मन्दिर घुम्नलाई विभिन्न देशबाट लाखौंको सँख्यामा पर्यटकहरु आउने गरिन्छ ।

तर, जानकी मन्दिरको गर्भगृह जहाँ जानकी (सीता), राम र लक्ष्मण चाँदीको मूर्ति राखिएको छ दर्शन उत्तैसम्म धेरैजनाले टुँग्याउने गरिन्छ । जानकी मन्दिर घुमघामको क्रममा बाहिरी बनावट हेर्दै भित्र प्रतिमासम्म दर्शनपूजा गरी फिर्ता हुने गरेको देखिएको छ ।

विभिन्न ठाउँका पर्यटकहरुले भने जानकी मन्दिरको चौतर्फी घुमघाम सहित सँगै रहेको विवाह मण्डप लगायत अन्य ठाउँमा घुमघाम गर्ने गरिएपनि जानकी मन्दिरभित्रै रहेको चलचित्र म्यूजियममा भने धेरै जना अझै गएर हेर्न सकेको छैनन् ।

जानकी मन्दिरको भित्री कम्पाउण्ढ देखि पश्चिम दक्षिणी कुनमा राखिएको जानकी म्यूजियममा रामायणकालिन दृश्यहरुलाई मूर्तिमार्फत अति आकर्षक रुपले दर्साइएको छ । जहाँ गएपछि जस्तोसुकै थकान र पीडामा रहेका श्रद्धालु, दर्शकहरु मनमुग्ध हुने गरेको छ ।

रामायणकालिन दृश्यहरुलाई मूर्तरुप दिएर बनाइएको चलमूर्ति (विद्युतबाट चल्ने मूर्ति) ले विभिन्न समयको, विभिन्न विधिको दृश्याँकन गरिएको देखिएको छ । जानकी मन्दिरको पश्चिमी दक्षिणी कुनामा प्रवेशद्धार रहेको जानकी म्यूजियमको लािग प्रतिव्यक्ति १५ रुपैयाँ नेपालीका दरले टिकट तोकिएको छ ।

म्यूजियममा प्रवेशको लागि सिढी चढेर माथिल्लो तल्लामा विवाहको विभिन्न विधिहरुलाई मूर्तीको रुपमा दर्साइएको छ । जानकी मन्दिरभित्र रहेको यो विद्युतिय चलचित्र म्यूजियममा हेर्न आउने दर्शक मनमुग्ध हुने गरेको छ ।

सुरुमा सीता (जानकी) को जन्म अर्थात मिथिलाका प्राचीन राजा जनकजीले हलो जोत्ने बेलामा धर्तीभित्रबाट जानकी भेटाएको किम्बदन्तीलाई मूर्तरुप दिइएको छ । सो खण्डमा राजा जनक हलो जोत्दै गरेको र जानकी भेटाएको दृश्यलाई देखाएको छ ।

त्यसपछि क्रमशः अगाडीका विधिहरुलाई दर्साएको हो । मूर्तीको क्रममा जानकी भेटाएपछि उनलाई रानी सुनैनाले गोदीमा राखेर खेलाउँदै गरेको दृश्य, जनक जिले गोदीमा राखेर सीता खेलाउँदै गरेको दृश्य र सीता सुतिरहेको अवस्थामा दासीहरु सहित आमा सुनैनाले पँखा घुमाउँदै गरेको दृश्य दृश्याँकन गरिएको छ ।

सोही क्रममा रामसीताको विवाह अघि भगवान राम जनकपुर आउँदा फूलबारीमा भएको प्रथम भेटपछिको दृश्यलाई पनि दृश्याँकन गरिएको छ । भगवान राम र सीताको फूलबारी भेट अर्थात फूलबारी लीलाको पनि विद्युतिया मूर्ति बनाइएको छ ।

विद्युतीय मूर्ति चलायमान रहेको छ भने मैथिली भाषामा गाइएको विभिन्न बैवाहिक विधिको गीतहरु पनि २४ सै घण्टा बजिरहेको हुन्छ ।

रामसीताको विवाहको दृश्याँकन, विवाह मण्डप, राम कलेवा सहित विवाहमा हुने अन्य विभिन्न विधी विधानहरुको मूर्ति बनाइएको छ जो की बाहिरबाट दर्शनको लागि म्यूजियममा आउने दर्शालुहरुलाई मनमुग्ध बनाउने गरेको छ ।

सोही खण्डमा दक्षिण पूर्वतिर माता जानकीजीले लगाउने विभिन्न वस्त्रहरु पनि सुरक्षित राखिएको छ । जानकी जी बालिका हुँदा लगाउने वस्त्र, आभूषणहरु पनि जानकी म्यूजियममा सुरक्षित राखिएको छ ।

जानकीजीले आईतबार, सोमबार, मँगलबार, बुधबार, विहिबार, शुक्रबार र शनिबार गरी प्रत्येक दिन प्रत्येक रँगको लगाउने वस्त्रलाई फ्रेम गरिएको छ भने जानकीको आभूषणलाई पनि नामाकरण गरी सुरक्षित राखिएको छ ।

पौराणिककालको ती आभूषणहरु करोडौं मूल्य बराबरको रहेको छ । हिरा, जबारात, सुन, चाँदीका विभिन्न गहनाहरु जानकी म्यूजियममा बाहिरबाट आउने दर्शनार्थीहरुलाई देखाउन गरिएको छ ।

जानकी मन्दिर घुम्न आउँदा जहिले पनि जानकी मन्दिरभित्रै रहेको जानकी म्यूजियममा घुमेपछि सम्पूर्ण कहानी र पौराणिक स्मरणहरु झलझल्ती हुने गरेको छ ।